شەوی ڕابردوو لە ئێران چی ڕوویدا؛ جەنگەکە بەرەو مەترسیدارترین قۆناغی خۆی هەنگاو دەنێت.
شەوی ڕابردوو ئاستی گرژییەکانی نێوان ئەمریکا و ئێران گەیشتە بەرزترین و مەترسیدارترین قۆناغی خۆی لە مێژوودا، کاتێک فڕۆکە جەنگییەکانی ئەمریکا هێرشێکی بەرفراوان و توندیان کردە سەر ژێرخانە مەدەنی و ستراتیژییەکانی باشووری ئێران.
ئەم هێرشانە کە ڕاستەوخۆ پردەکان، فڕۆکەخانەکان، وێستگەکانی کارەبا و شەمەندەفەر، و تاوەرەکانی پەیوەندیکردنیان کردە ئامانج، وەرچەرخانێکی گەورە و توندن لە شێوازی ڕووبەڕووبوونەوەکەدا، چونکە بە تەواوەتی تۆڕی گواستنەوە و دابینکردنی وزە و شتومەکیان لە ناوچەکەدا پەکخستووە.
میدیا فەرمییەکانی ئێران ڕایانگەیاندووە، کە یەکێک لە سەرەتاییترین ئامانجەکانی بۆردومانەکە، ئەو پردە ستراتیژییە بووە کە شاری بەندەر عەباس بە شیرازەوە دەبەستێتەوە و بە یەکێک لە گرنگترین ڕێگا وشکانییەکانی باشووری ئەو وڵاتە دادەنرێت.
هاوکات بەپێی ڕاپۆرتی ئاژانسی تەسنیم، پردی ڕووباری شۆر لە ناوچەی کوهورستانی سەر بە پارێزگای هورمزگان لێدراوە و بە تەواوەتی هاتوچۆی لەسەر ڕێگای زیندووی بەندەر عەباس ــ لار لە هەردوو ئاڕاستەکەوە ڕاگرتووە. زیانەکانی ئەم پێکدادانە تەنها ماددی نەبوون، بەڵکو تەلەفزیۆنی فەرمی ئێران ئاشکرای کردووە کە بۆردومانکردنی دوو پرد لە شاری بەندەر خەمیر بووەتە هۆی کوژرانی شۆفێری ئۆتۆمبێلێک کە لە کاتی هێرشەکەدا بەسەر یەکێک لە پردەکاندا تێدەپەڕی، دواتریش میدیاکان پشتڕاستیان کردەوە کە ئاماری قوربانیانی هێرش بۆ سەر پردەکانی کوهورستان و غەریوە بۆ دوو کوژراو و چوار بریندار بەرزبووەتەوە.
گرژییەکان تەنها لەسەر ڕێگا دەرەکییەکان نەوەستان، بەڵکو ناوچە نیشتەجێبووەکانیشیان گرتەوە، کاتێک گەڕەکی تەپەی ئەڵڵاهوئەکبەر لە ناو جەرگەی شاری بەندەر عەباس کرایە ئامانج. بەپێی ڕاگەیەندراوی زانکۆی زانستە پزیشکییەکانی هورمزگان و ئاژانسی فارس، لەم هێرشەدا سەرەتا باس لە برینداربوونی حەوت کەس دەکرا، بەڵام دواجار ئامارەکە بۆ کوژراوێک و هەشت بریندار بەرزبووەوە.
هاوشان لەگەڵ ئەمەشدا، شاری بەندەر عەباس بە تەواوەتی شایەتی بڕانی کارەبا و پچڕانی هێڵەکانی گەیاندن بوو دوای ئەوەی تاوەرێکی سەرەکی پەیوەندییەکان و وێستگەیەکی گۆڕینی هێڵی شەمەندەفەر لە ناو شارەکەدا لێدران، کە تێیدا دوو کارمەندی شەمەندەفەرەکەش بریندار بوون.
هاوکات بازنەی هێرشەکان بە خێرایی فراوانتر بوو بۆ پارێزگای سیستان و بەلووچستان، بە شێوەیەک کە فڕۆکەخانەی ئێرانشار ڕووبەڕووی بۆردومانی ڕاستەوخۆ بووەوە و دەنگی تەقینەوەی گەورە لە دەوروبەری بیسترا. لە دوورگەی گەشتیاری و ستراتیژی قیشم، ئاژانسی مێهر بڵاوی کردەوە، کە لانی کەم دە تەقینەوەی بەهێز بەهۆی بۆردومانی فڕۆکەکانی ئەمریکاوە لە چەند ناوچەیەکی جیاوازی دوورگەکە ڕوویانداوە. لە هەمان کاتدا، دەنگی تەقینەوەی گەورە شاری بوشەهر، دەوروبەری شاری سیریک و ناوچەیەکی نزیک لە شاری بوستانی لە پارێزگای خوزستانی هەژاند.
ئەم پەرەسەندنە مەترسیدارانە نیشانەی ئەوەن کە ئەمریکا ڕاستەوخۆ دەستی کردووە بە لێدانی جومگە سەرەکییەکانی گواستنەوەی کاڵا و تێکدانی تواناکانی بەندەر عەباس کە گەورەترین بەندەری بازرگانی ئێرانە.
لە بەرامبەردا، ئێران بە چڕی خۆی بۆ وەڵامدانەوەیەکی سەربازیی هاوشێوە ئامادە دەکات، کە چاودێران پێشبینی دەکەن لە ڕێگەی تێکدانی ئاسایشی کەشتیوانی لە کەنداو، داخستنی گەرووی بابولمەندەب یان هێرشکردنە سەر بەرژەوەندییەکانی تری ئەمریکا بێت، ئەمەش وایکردووە تەواوی ناوچەکە لەسەر لێواری تەقینەوەیەکی گەورەتر بێت کە کەس نازانێت لە ڕۆژانی داهاتوودا چی بەدوای خۆیدا دەهێنێت.