ئێران دوو هاووڵاتی کوردی بە تۆمەتی ئەندامبوون لە ڕێکخراوی داعش لەسێدارە دا.
ڕێکخراوی مافی مرۆڤی هەنگاو بڵاویکردەوە کە بەرەبەیانی ئەمڕۆ سێشەممە، سزای سێدارەی محێدین عەبدوڵاهی و حسێن پاڵانی لە بەندیخانەی قەزڵحەساری کەرەج جێبەجێ کرا.
ڕوونیشیکردەوە کە ئەو دوو هاووڵاتییە خەڵکی سەرپێڵی زەهاو بوون و بە تۆمەتی “بەغی” لەسێدارە دراون کە مەبەست لێی پەنابردنە بەر هێزی چەکدارییە دژ بە دەسەڵات.
بەوتەی سەرچاوەکانی هەنگاو، ئەم دوو بەندکراوە نۆ ساڵ لەمەوبەر لەلایەن هێزەکانی ئیتڵاعاتی سوپای پاسدارانەوە دەستبەسەر کرابوون و لەو کاتەوە لە بەندیخانەکانی ڕەجاییشار و قەزڵحەساری کەرەج بەندکرابوون.
میدیاکانی سەر بە دامەزراوە ئەمنییەکان و دەزگای دادوەریی کۆماری ئیسلامیی ئێران بانگەشەی ئەوە دەکەن کە ئەم دوو هاووڵاتییە ئەندامی شانەکانی سەر بە ڕێکخراوی “داعش” بوون لە ناوچە سنوورییەکاندا کە لە کاتی پێکدادان و گەمارۆدانی سەربازی لەلایەن هێزەکانی ئێرانەوە دەستبەسەر کراون.