سعوودیە و پاکستان جەخت لەسەر دەستپێکردنەوەی گفتوگۆکانی نێوان ئەمریکا و ئێران دەکەنەوە.
وەزیرانی دەرەوەی عەرەبستانی سعوودیە و پاکستان لە پەیوەندییەکی تەلەفۆنیدا پرسی گرژییەکانی ناوچەکەیان تاوتوێ کرد و داوایان کرد هەوڵەکان بخرێنەگەڕ بۆ دەستپێکردنەوەی دانوستانەکانی نێوان واشنتن و تاران، بە ئامانجی سەقامگیرکردنی ناوچەکە.
ئاژانسی هەواڵی سعوودی (واس) ئاشکرای کردووە، کە شازادە فەیسەڵ بن فەرحان، وەزیری دەرەوەی سعوودیە، پەیوەندییەکی تەلەفۆنی لەلایەن محەمەد ئیسحاق دار، جێگری سەرۆک وەزیران و وەزیری دەرەوەی پاکستانەوە پێگەیشتووە. لەم پەیوەندییەدا بە قووڵی تاوتوێی دوایین پێشهات و ئاڵۆزییەکانی ئێستای ناوچەکە کراوە.
هەر دوو وڵات جەختیان لەسەر چەند خاڵێکی سەرەکی کردووەتەوە بۆ ڕێگریکردن لە تەشەنەسەندنی زیاتری ململانێکان:
دەستپێکردنەوەی گفتوگۆکان: پێویستیی پاڵپشتیکردنی نێوەندگیریی نێودەوڵەتی و دەستپێکردنەوەی خێرای گفتوگۆکانی نێوان ئەمریکا و ئێران بە مەبەستی کۆنترۆڵکردنی گرژییەکان.
چارەسەری گشتگیر: کۆششکردن بۆ گەیشتن بە چارەسەرێکی ئاشتیانە و گشتگیر کە بتوانێت ئاسایش و سەقامگیری لەسەر هەردوو ئاستی هەرێمی و نێودەوڵەتی بەهێز بکات.