بە فەرمی ناوی فڕۆکەخانەی پاڵم پێچ گۆڕدرا بۆ “فڕۆکەخانەی نێودەوڵەتیی دۆناڵد جەی ترەمپ”.
دەسەڵاتی فڕۆکەوانیی فیدراڵیی ئەمریکا (FAA) بە شێوەیەکی فەرمی گۆڕینی ناوی فڕۆکەخانەی نێودەوڵەتیی پاڵم پێچی لە باشووری ویلایەتی فلۆریدا ڕاگەیاند، کە لەمەودوا بە ناوی “فڕۆکەخانەی نێودەوڵەتیی سەرۆک دۆناڵد جەی ترەمپ” ناسراو دەبێت. ئەم بڕیارە کە دوای واژۆکردنی یاسایەک لەلایەن ڕۆن دێسانتیس، پارێزگاری فلۆریداوە لە سەرەتای ئەمساڵدا ڕێگەی پێدرا، لە ڕۆژی پێنجشەممەی ڕابردووەوە بە فەرمی چووەتە بواری جێبەجێکردنەوە.
هەر لە یەکەم ڕۆژی گۆڕینی ناوەکەدا، فڕۆکەی تایبەتیی دۆناڵد ترەمپ کە بە “Trump Force One” ناسراوە و لە جۆری بۆینگ 757ە، کاتژمێر 5ی بەیانی وەک یەکەم فڕۆکە لە فڕۆکەخانەکە نیشتەوە کە ئیریک ترەمپی کوڕی سەرۆکی پێنجشەممەی لەگەڵدا بوو.
ئەم فڕۆکەخانەیە پێگەیەکی گرنگی بۆ خێزانی ترەمپ هەیە، بەوپێیەی بەردەوام بەکاری دەهێنن بۆ سەردانیکردنی کۆمەڵگە و کۆشكی بەناوبانگی “مار-ا-لاگو” لە ناوچەی پاڵم پێچ. جێی ئاماژەیە، هەر لە سەرەتای ئەمساڵدا، ئەو شەقامە سەرەکییەش کە فڕۆکەخانەکە بە کۆشکەکەی ترەمپەوە دەبەستێتەوە، ناوەکەی گۆڕدرا بۆ “شەقامی دۆناڵد جەی ترەمپ”.
بەرپرسانی فڕۆکەخانەکە ڕایانگەیاندووە کە پرۆسەی گۆڕینی تەواوی لۆگۆ و تابلۆکانی ناو تێرمیناڵەکان چەند هەفتەیەک دەخایەنێت. وردەکاریی دارایی و کارگێڕیی گۆڕانکارییەکە بەم شێوەیەیە:
تێچووی ناوگۆڕینەکە: گۆڕینی تابلۆکان و براندینگی نوێی فڕۆکەخانەکە نزیکەی 5.5 ملیۆن دۆلاری ئەمریکی تێدەچێت.
گۆڕینی کۆدی فڕۆکەخانە: کۆدی فەرمیی گەشتوگوزاری فڕۆکەخانەکە لە سێ پیتی (PBI)ی پێشوو، لە ڕۆژی 18ی ئابی داهاتووەوە بە فەرمی دەگۆڕێت بۆ (DJT).
هاکات لەگەڵ ئەم ڕووداوە لە فلۆریدا، لە ویلایەتی تێنیسی ئەمریکاش و لە مەراسیمێکی فەرمیدا بە ئامادەبوونی بەرپرسانی باڵا وەک وەزیری گەنجینە و سیناتۆرەکان، پردی سەرەکیی گەورەڕێگای I-40 لە ڕۆژهەڵاتی تێنیسی بە فەرمی ناوەکەی گۆڕدرا بۆ “پردی دۆناڵد جەی ترەمپ”، ئەمەش وەک ڕێزلێنانێک لە سەرۆکی پێشووی ئەمریکا لەو ناوچانەی کە لە هەڵبژاردنەکاندا دەنگێکی زۆری بەدەستهێناوە.