عێراق هەنگاوی نێودەوڵەتی دەنێت بۆ گەڕاندنەوەی پارە دزراوەکان و دەستگیرکردنی تۆمەتباران.
دەستەی دەستپاکیى فیدراڵیی عێراق ڕایگەیاند کە ڕەشنووسی چەندین یاداشتی لێکتێگەیشتنی نێودەوڵەتییان ئامادە کردووە بە مەبەستی گەڕاندنەوەی پارە دزراوەکان و ڕادەستکردنەوەی ئەو تۆمەتبارانەی کە لە دەرەوەی وڵاتن.
عەباس مەتسەب، بەڕێوەبەری گشتیی فەرمانگەی گەڕاندنەوە لە دەستەی دەستپاکی و جێگری سەرۆکی ئەنجومەنی کارگێڕیی سندوقی گەڕاندنەوەی پارەکانی عێراق، لە لێدوانێکی ڕۆژنامەوانیدا ڕوونی کردەوە کە هاوکاریی وڵاتان لەم دۆسیەیەدا وەک یەک نییە:
هەندێک وڵات بەهۆی هۆکاری تایبەت بە خۆیانەوە (کە زۆرجار ئابووری یان مرۆیین) هاوکاریی عێراق ناکەن، یاخود یاسا ناوخۆییەکانیان ڕێگە بە جێبەجێکردنی داواکارییەکانی عێراق نادات.
لە زۆربەی کاتەکاندا، کەسانی گەندەڵکار مافی پەنابەرییان لەو وڵاتانە وەرگرتووە، ئەمەش پرۆسەی ڕادەستکردنەوەیان قورس دەکات.
عێراق بۆ تێپەڕاندنی ئەم ڕێگرییانە پەنا دەباتە بەر دانوستان و بەکارهێنانی میکانیزمە بەدیلەکان بۆ دروستکردنی هاوکاری.
ئەم هەوڵانەی دەستەی دەستپاکی لە کاتێکدایە کە حکومەتی عێراق بە سەرۆکایەتیی عەلی فالح زەیدی، چەندین ڕێکاری توندی گرتووەتەبەر بۆ ڕاوەدوونانی داواکراوان لە کەیسەکانی گەندەڵیدا و چالاککردنی ڕێوشوێنە دادوەرییەکان بە مەبەستی گەڕاندنەوەی تەواوی ئەو پارانەی لە ناوخۆ و دەرەوەی عێراق دزراون.
لە چوارچێوەی پەرەپێدانی میکانیزمەکانی دەستگیرکردنی تۆمەتباراندا، دەستەی دەستپاکی لە ماوەی ڕابردوودا ڕێککەوتنێکی هاوکاریی لەگەڵ نووسینگەی ناوەندیی نیشتمانیی ئینتەرپۆل لە بەغداد واژۆ کردووە. ئەم ڕێککەوتنە ڕێگە بە دەستەی دەستپاکی دەدات کە:
گەیشتنی ڕاستەوخۆی بە سیستم و تۆڕی زانیارییەکانی ئینتەرپۆلی نێودەوڵەتی هەبێت.
بە شێوەیەکی خێرا چاودێریی زانیارییەکانی تایبەت بە کەسانی داواکراو بکات.
ئاستی هاوکاری و هەمغەماهنگی لەگەڵ ئەو دەزگایانەدا بەرز بکاتەوە کە بەرپرسن لە لێکۆڵینەوە تاوانکارییەکان لە وڵاتانی جیاوازی جیهاندا.