بەرەی مقاوەمەی ئیسلامی لە عێراق جەخت لەسەر مانەوەی چەکەکەیان دەکاتەوە و ئەمینداری گشتیی کەتائیبی حزبوڵڵاش هۆشدارییەکی توند ئاڕاستەی حکومەت و بەرپرسان دەکات.
مقاوەمەی ئیسلامی لە عێراق ڕایگەیاند، بە هیچ شێوەیەک دەستبەرداری چەکەکەی نابێت و کار دەکات بۆ پەرەپێدانی توانای سەربازی و ئەمنی و بەرزکردنەوەی ئاستی ئامادەیی هێزەکانی. لە بەیاننامەیەکی فەرمیدا کە درەنگانی شەوی هەینی بڵاوکراوەتەوە، ئاماژە بەوە کراوە کە چەکەکەیان هەرگیز جێگەی سازش نییە، بەڵکو وەک عەقیدە و پەیمانێک لەسەر شانیان وەسفیان کردووە.
بەرەی مقاوەمە جەختی کردەوە کە تەنیا لەم ئاستەی ئێستادا ناوەستن، بەڵکو بە هەموو هێزێکەوە کار دەکەن بۆ پەرەپێدانی تواناکانیان لە ڕووی چەندایەتی و جۆرییەوە. ئامانجی ئەم هەنگاوە بۆ ئەوە دەگەڕێننەوە کە بتوانن لەگەڵ قەبارەی ئەو هەڕەشانەدا بگونجێن کە لە لایەن ئیسرائیل و ئەمریکاوە ئاڕاستەیان دەکرێت، تا پارێزگاری لە پێگەی خۆیان بکەن.
ئەبو حسێن حەمیداوی، ئەمینداری گشتیی کەتائیبی حزبوڵڵا، هۆشدارییەکی توندی ئاڕاستەی حکومەتی عێراق و بەرپرسان کرد. حەمیداوی داوای لە حکومەت کرد کە “ملکەچی مقاوەمە بن”. ناوبراو ئاماژەی بەوەش کرد کە کەتائیبی حزبوڵڵا لەسەر دەست و بە بڕیاری ڕێبەری کۆچکردووی ئێران دامەزراوە و پیاوەکانیان تا ئێستاش لەسەر ئەو ڕێبازە جێگیرن و بەردەوام دەبن.
ئەمینداری گشتیی کەتائیبی حزبوڵڵا باسی لە بەشداریکردنی بەکۆمەڵی خەڵک لە مەراسیمی بەخاکسپاردنی ئەم دواییانەی ڕێبەری ئێران کرد. حەمیداوی ئەو ئامادەبوونە ملیۆنییەی وەک “ڕاپرسییەکی جەماوەری” ناوبرد کە تیایدا عێراقییەکان پشتیوانیی خۆیان بۆ مقاوەمەی ئیسلامی و مانەوەی چەکەکەیان دووپات کردووەتەوە و ڕەوایەتییان بە ڕێبازەکەیان داوە.