تۆڕی “ئێکس” ئامرازێکی نوێی پەخشی ڕاستەوخۆ رادەگەیەنێت و ملیۆنێک دۆلاریش بۆ بەرهەمهێنەران تەرخان دەکات
ئەمڕۆ پێنجشەممە، 2ی تەممووزی 2026، تۆڕی کۆمەڵایەتیی “ئێکس” (تویتەری پێشوو) بۆ بەهێزکردنی پێگەی خۆی لە بازاڕی پەخشی ڕاستەوخۆدا، ئامرازێکی نوێی بە ناوی (Live Studio) لە چوارچێوەی پاکێجی (Creator Studio) ڕاگەیاند.
بەپێی ئەو زانیارییانەی “نیکیتا بیر”، سەرۆکی بەرهەمەکان لەو تۆڕە ئاشکرای کردووە، ئامرازە نوێیەکە وەک ناوەندێکی یەکگرتوو کار دەکات بۆ بەڕێوەبردنی پەخشی ڕاستەوخۆ، کە ڕووکارێکی ئاسانی هەیە و ڕێگە بە بەرهەمهێنەران دەدات بە ئاسانی پەخشەکان ئامادە بکەن، ناونیشان و وێنەی بەرگ زیاد بکەن و پەخشەکانیان پێشوەختە خشتەبەند بکەن.
تایبەتمەندییەکانی ئامرازە نوێیەکە:
کۆنتڕۆڵکردنی بینەران: بەکارهێنەر دەتوانێت دیاری بکات پەخشەکە بۆ گشتی بێت، یان تەنها بۆ بەشداربووانی مووچەخۆر (Premium)، یان تەنها بۆ فۆڵۆوەرەکان و بەشداربووانی باوەڕپێکراو.
ئاماری لەساتدا: ئامرازەکە ئاماری وردی لەکاتی پەخشدا پێشکەش دەکات، وەک ژمارەی بینەران، دابەشبوونی جوگرافییان، و جۆری ئەو ئامێرانەی بەکاری دەهێنن.
ملیۆنێک دۆلار وەک هاندان: لەلایەکی دیکەوە، تۆڕی ئێکس بڕی ملیۆنێک دۆلاری وەک مکافات بۆ بەرهەمهێنەران تەرخان کردووە، بەڵام تا ئێستا میکانیزمی دابەشکردن و پێوەرەکانی وەرگرتنی ئەم پارەیە ئاشکرا نەکراوە.
شایانی باسە، سەرەڕای ئەم هەنگاوە، خزمەتگوزاریی پەخشی ڕاستەوخۆ تەنها بۆ بەشداربووانی خزمەتگوزاریی (X Premium) بەردەستە کە نرخەکەی لە مانگێکدا لە 3 دۆلارەوە دەست پێدەکات. لەگەڵ ئەوەشدا، شارەزایان ئاماژە بەوە دەکەن کە ئێکس هێشتا بەدەست کێشەی جێگیریی سێرڤەرەکانەوە لە کاتی رووداوە گەورەکان دەناڵێنێت، هەروەها بەراورد بە تۆڕەکانی وەک “Twitch”، هێشتا ڕوونیی پێویستی لە سیستەمی داهات و قازانجی بەرهەمهێنەراندا نییە.