ئەندامێكی سەركردایەتی یەكێَتی پێی وایە، “پارتی نایەوێت ڕێککەوتن بکرێت و کات دەکوژێت” و دەشڵێت: هەموو جومگەکانی دەسەڵات لای پارتیە و نایەوێت دەستبەرداری هیچیان ببێت.
لوقمان وەردی، ئەندامی سەرکردایەتی یەکێتی ڕایگەیاندووە، داوای شەراکەتی ڕاستەقینە دەکەین، بەڵام پارتی کات دەکوژێت و نایەوێت ڕێککەوتن بکرێت.
ڕاشیگەیاندووە، یەکێتی ئامادەیی خۆی بۆ دانوستاندن و ڕێککەوتن دەربڕیوە و ئەگەر پارتی بیەوێت دەتوانین بە یەک ڕۆژ ڕێکبەوین. یەکێتی گفتوگۆ و ڕێککەوتن بە مەرج ناکات.
ئاماژەی بەوەكردووە، پێویستە بەرپرسانی پارتی خەڵک لەڕێکەوتن نائومێد نەکەن.
دەشڵێت: یەکێتی داوای شەراکەتی ڕاستەقینە دەکات، چونكە هەموو جومگەکانی دەسەڵات لای پارتیە و نایەوێت دەستبەرداری هیچیان ببێت.
ئەو بەرپرسەی یەكێتی جەختیشی كردۆتەوە، ئێمە پەرلەمانی کوردستانمان پەکنەخستووە.
وەردی ئاماژەی بەوەكردووە، پێشتریش پارتی و گۆڕان ڕێککەوتن و یەکێتی دژایەتی نەکردن. هاوپەیمانی یەکێتی و نەوەی نوێ هیچ گرفتێکی تێدا نیە.