دوای گران بوونی نرخی بەنزین لە هەولێر و دهۆك، ئەمڕۆ لە سلێمانی-ش نرخی بەنزین گران بوو.
بەپێی بەدواداچوونی (خەڵك) ئێوارەی ئەمڕۆ لە بەنزینخانەكانی سلێمانی نرخی بەنزین بۆ هەر سێ جۆری (نۆرماڵ و موحەسەن و سوپەر) بڕی 50 دیناری چۆتەسەر.
بەو جۆرەش ئێستا نرخی بەنزین لە سلێمانی نۆرماڵ بووە بە 1000 دینار و لە هەولێر بووە بە 1075 دینار و لە دهۆك بووە بە 1025 دینار.
بەهمەن قادر، وتەبێژی بەنزینخانەکانی سلێمانی رایگەیاند “ئەمڕۆ کاتژمێر ٤:٠٠ ـی دوای نیوەڕۆ هەرسێ جۆرەکەی بەنزین ٥٠ دینار چووەتە سەر نرخەکەیان، ئێستا بەنزینی نۆرماڵ بە ١٠٠٠ دینار، موحەسەن بە هەزار و ٢٠٠ دینار و سوپەر بە هەزار و ٣٥٠ دینارە”.
سەبارەت بە هۆکاری بەرزبوونەوەی نرخی بەنزین وتەبێژی بەنزینخانەکانی سلێمانی وتی “سووتەمەنی لە ئێران گرانبووە و کەمتر دێتە هەرێمی کوردستان و لە هەولێریش داناگاز و لاناز ناردنی بەنزینیان بۆ سلێمانی کەم کردوەتەوە لەبەر پێویستی هەولێر خۆی بە بەنزین، حکومەتی عێرقیش لە ئێستادا کێشەی کەمی بەنزینی هەیە و پێشتر لە باشوری عێراقەوە بەنزینمان بۆ دەهات”.
ئاماژەی بەوەشكرد کە “هاتن و زیادبوونی گەشتیار و جوڵە لە سلێمانی هۆکارێکی دیکەی بەرزبوونەوەی نرخەکەیە”.
گران بوونی نرخی بەنزین لە هەرێم لەكاتێكدایە، كە شەڕی ئێران و ئەمریكا كۆتایی هاتووە و دۆخی ناوچەكە ئاسایی بۆتەوە و دەروازە سنوورییەكان كراونەتەوە.
لای خۆشیەوە، جوانڕۆ محەمەد، ئەندامی پەرلەمانی كوردستان لە هەژماری خۆی لە فەیسبووك نووسیویەتی، “50 هەزار بەرمیل نەوتی ڕۆژانەیان پێدەدرێت و هەر زوو زوو 50 دینار نرخی بەنزین گران دەکەن!”.
دەشڵێت: گرانبونی بەنزین زوڵمێکی ترە و پێویستە ئەو 50 هەزار بەرمیل نەوتی رۆژانەیە بخرێتە خزمەتی خەڵکەوە بۆ دابەزاندنی نرخی سوتەمەنی.
پێشتر بەپێی ڕێككەوتنی هەرێم و عێراق بۆ ڕادەست كردنی نەوت، ڕۆژانە بڕی 50 هەزار بەرمیل نەوتی خاو دەدرێتەوە بە هەرێمی كوردستان تاكو بیپاڵێوێت و نەوت و بەنزین بە نرخی هەرزان وەك عێراق بدات بە هاووڵاتیان، بەڵام تا ئێستا نرخی بەنزین لە هەرێم گرانە و وەك عێراقی لێ نەكراوە.