جێگری بەرپرسی نووسینگەی سەرۆک وەزیران ئاشكرای دەكات، تیمی (هەژماری من) لەگەڵ وەزارەتی دارایی کاردەکات بۆ پێشکەشکردنی هەموو ئاسانکارییەک لە دەرکردنی کارتە بانکییەکان و تەواوکردنی پرۆسەی تۆمارکردن.
عەزیز ئەحمەد، جێگری بەرپرسی نووسینگەی سەرۆک وەزیرانی هەرێمی کوردستان، لە پۆستێکدا لە تۆڕی کۆمەڵایەتی (ئێکس) بڵاوی كردەوە: “لە لیستی مووچەی حکومەتی هەرێمی کوردستاندا زیاتر لە 350 هەزار خانەنشین هەیە، تاكو ئێستا 50 هەزار كارتی بانكی لەلایەن خانەنشینان وەرنەگیراوەتەوە و بە هەزارانیش خۆیان لە (هەژماری من) تۆمار نەكردووە.”
روونیشی کردەوە: “تاوەكو ئێستا زیاتر لە نیوەی ئەو خانەنشینانە مووچەکانیان بە دیجیتاڵی و لە ڕێگەی سیستەمی (هەژماری من)ەوە وەرگرتووە، ئەمەش بووەتە هۆی کۆتاییهێنان بە ڕاوەستانیان لە سەرە درێژەکاندا.”
ڕاشیگەیاند: “بوونی جێگرەوەیەکی باشتر و شایستەتر بۆ وەرگرتنی مووچەکانیان، وایکردووە بینینی دیمەنی قەرەباڵغی بەردەم بانکەکان جێگەی داخی زۆر بێت.”
وتیشى: “ئەوانەی هێشتا کارتەکانیان وەرنەگرتووەتەوە، بچن لە زووترین کاتدا بیبەنەوە، تاوەکو لە قەرەباڵغی، ماندووبوون و پشێوییەکانی بەردەم بانکەکان بەدوور بن و بتوانن بە شێوازێکی ئاسانتر مووچەکانیان پێبگات.”
دەشڵێت: “داوا لە گەنجان و فەرمانبەرانی خانەنشینکراو دەكەین هاوکاریی خانەنشینانی تەمەن گەورە بکەن بۆ تۆمارکردنی ناویان لە (هەژماری من) تا لە خزمەتگوزارییەکانی پارەدانی دیجیتاڵی سوودمەند ببن.”
جێگری بەرپرسی نووسینگەی سەرۆک وەزیرانی هەرێم ئاشكراشی كرد: “تیمی (هەژماری من) لە نزیکەوە و بە هەماهەنگیی تەواو لەگەڵ وەزارەتی دارایی و ئابووری حکومەتی هەرێم کاردەکات بۆ پێشکەشکردنی هەموو ئاسانکارییەک لە دەرکردنی کارتە بانکییەکان، تەواوکردنی پرۆسەی تۆمارکردن و گواستنەوەی کۆتایی مووچەکان بۆ سەر سیستەمی پارەدانی دیجیتاڵی.”