بەپێی ڕاپۆرتێکی پێگەی تەکنەلۆجیی ئەمریکی “TechCrunch”، کۆمپانیای ئەپڵ (Apple) کۆمەڵێک تایبەتمەندی نوێی بۆ ئاسانکاری گەیشتن و بەکارهێنان (Accessibility) بۆ خاوەن پێداویستییە تایبەتەکان ڕاگرتووە، کە بەکارهێنانی ئامێرە جیاوازەکانی کۆمپانیاکە ئاسانتر دەکات. ئەم تایبەتمەندییانە بەش گەلێکی وەک خوێندنەوەی دەنگی دەقەکان (VoiceOver)، کۆنترۆڵکردنی دەنگی، و تەنانەت تایبەتمەندییەکانی ژیریی دەستکرد بە پشتبەستن بە سیستمی “Apple Intelligence” لەخۆدەگرن.
ڕاپۆرتەکە ڕوونی کردووەتەوە کە تایبەتمەندییە نوێیەکان بە شێوەیەکی ڕاستەوخۆ پشت بە تواناکانی ژیریی دەستکردی ئەپڵ دەبەستن، تەنانەت ئەگەر تایبەتمەندیی بەرهەمهێنەریش (Generative) نەبن. لە نێویاندا تایبەتمەندی “VoiceOver” کە ڕێگە بە بەکارهێنەر دەدات وێنەیەک، دەقێک، یان ڤیدیۆیەک بگرێت و ڕاستەوخۆ پرسیاری لەسەر بکات، تاوەکو مۆدێلی ژیریی دەستکردەکە دەستبەجێ وەڵامەکەی بەرهەم بهێنێت.
کۆمپانیاکە تاقیکردنەوەیەکی بۆ ئەم تایبەتمەندییە خستەڕوو؛ لە ڕێگەی نیشاندانی وێنەی پسوڵەیەکی کڕین، پاشان داوا لە سیستمەکە کرا کە پسوڵەکە بخوێنێتەوە و تێچووی گشتی و ڕێکەوتی درانی پارەکەی بە بەکارهێنەرەکە بڵێت، مۆدێلەکەش بە سەرکەوتوویی کارەکەی ئەنجامدا.
هەروەها ئەپڵ کۆمەڵێک فەرمانی دەنگی نوێی زیادکردووە کە دەکرێت ڕاستەوخۆ لە ناو سیستمەکەوە بەکاربهێنرێن بۆ ئاسانکردنی کارپێکردنی ئامێرەکان، لەوانە ئاڕاستەکردنی فەرمانی دەنگی بۆ مۆبایلەکە بۆ گەورەکردنی وێنەکان (Zoom)، یان داگیرساندنی گلۆپی لایت (Flashlight) و چەندین بەکارهێنانی سەرەکی تری مۆبایلەکە.
لەلایەکی ترەوە، ڕاپۆرتێکی جیاوازی پێگەی “MacRumors”ی ئەمریکی ئاماژە بە بوونی تایبەتمەندییەکی تر دەکات کە کاردەکات بۆ نووسینی ژێرنووسی ڕاستەوخۆ (Live Captions) بۆ ئەو دەنگانەی بەکارهێنەر لە چواردەوری خۆی بە هەر زمانێک بێت دەیانبیستێت، لەوانەش گۆڕینی دەنگی ڤیدیۆکان بۆ ژێرنووس تەنها لە ڕێگەی مۆبایلەکەوە بەبێ پێویستی بە فایلی دەرەکیی تایبەت بە ژێرنووس.
هاوکات کۆمەڵێک تایبەتمەندی تریش بەردەست دەبن، وەک بەستنەوەی باشتری مۆبایلەکە بە ئامێرەکانی بیستنی دەرەکی، و تەنانەت ئاگادارکردنەوەی ئەو بەکارهێنەرانەی کێشەی بیستنیان هەیە لە کاتی هێنانی ناویان یان وتنی وشەیەکی دیاریکراو لە چواردەوریاندا.
بەرنامەی پەیوەندی ڤیدیۆیی “FaceTime”یش تایبەتمەندییەکی نوێی پێدەگات کە ڕێگەی پێدەدات ڕاستەوخۆ بەستەر بێت بە ئەپڵیکەیشنەکانی دەرەکیی وەرگێڕانی زمانی هێما (زمانى ئاماژە)، ئەمەش بەکارهێنانی بەرنامەکە بۆ ئەو کەسانەی کێشەی کەمبیستنیان هەیە زۆر ئاسانتر دەکات.
ئەپڵ ئەوەشی ڕاگرتووە کە کۆمەڵێک پاشکۆ و کەرەستەی هاوپێچی نوێ (Accessories) لەسەر ئاستی جیهان دەخاتە بازاڕەوە کە ڕێگە بەو کەسانە دەدات کە کێشەی جووڵەیان هەیە بە شێوەیەکی باشتر مۆبایلەکە بگرن و کۆنترۆڵی بکەن، ئەمەش سەرەڕای پاڵپشتیکردنی بەکارهێنانی چاویلکەی واقیعی تێکەڵاوی “Vision Pro” بە شێوەیەکی ڕاستەوخۆ لە ڕێگەی کورسی کەمئەندامانەوە (Wheelchair).
ئەم تایبەتمەندییانە بەشدارن لە بەرزکردنەوەی ئەزموونی بەکارهێنانی مۆبایلەکانی “ئایفۆن” و بەرهەمەکانی کۆمپانیاکە بە گشتی، هەروەها کارئاسانی بۆ گەشەپێدەران (Developers) دەکەن تاوەکو نەرمەکاڵای تایبەت بۆ یارمەتیدانی خاوەن پێداویستییە تایبەتەکان بە پشتبەستن بە ژیریی دەستکردی کۆمپانیاکە بەرهەم بهێنن.
لەکاتێکدا ئەپڵ وادەیەکی کۆتایی بۆ ڕاگرتنی ئەم تایبەتمەندییە نوێیانە دیاری نەکردووە، بەڵام پێشبینی دەکرێت لەگەڵ نوێکردنەوەی داهاتووی سیستمی کارپێکردنی “iOS 27″دا بگەن، کە ئەپڵ پایزی هەموو ساڵێک هاوکات لەگەڵ خستنەڕووی مۆبایلە نوێیەکانی ئایفۆن بڵاوی دەکاتەوە، بەڵام سیستمەکە خۆی لە میانی کۆنگرەی ساڵانەی گەشەپێدەرانی ئەپڵ (WWDC) لە سەرەتای مانگی حوزەیرانی داهاتوودا ڕادەگەیەنرێت.
ئاشکراکردنی ئەم تایبەتمەندییە نوێیانەی ئەپڵ هاوکاتە لەگەڵ بەڕێوەچوونی کۆنگرەی ساڵانەی گەشەپێدەرانی گووگڵ (Google I/O)، کە ئەویش شایەتی پەردەلادان بوو لەسەر نوێترین تایبەتمەندییەکانی ژیریی دەستکردی کۆمپانیاکەیان.