بەڕێوەبەری شارەوانی ئاکرێ ڕایدەگەیەنێت، ڕۆژی پێنج شەممە زیاتر لە هەزار پارچە زەوی دیکە بەسەر فەرمانبەراندا دابەشدەکرێت.
بلند زێباری، بەڕێوەبەری شارەوانی ئاکرێ ڕایگەیاندووە، پڕۆسەی دابەشکردنی زەوی لە سنووری شارەوانییەکەمان بەردەوامە و بڕیارە ڕۆژی پێنج شەممەی داهاتوو دەست بکرێت بە دابەشکردنی زەوی بەسەر ژمارەیەکی زۆر لە فەرمانبەران و سوودمەندان.
ئاماژەی بەوەشکرد، لە سەنتەری شارەوانی ئاکرێ تا ئێستا زیاتر لە 5 هەزار پارچە زەوی دابەشکراوە و بڕیارە لە ڕۆژی پێنج شەممەی داهاتوو زیاتر لە 1000 پارچە زەوی دیکە دابەشبکرێت.
وتیشی: “مەرجی وەرگرتنیان ئەوەیە کۆی خاڵەکانیان لە 26 خاڵ و بەرەو سەرەوە بێت”.
سەبارەت بە شوێنی زەوییەکان، بەڕێوەبەری شارەوانی ئاکرێ ڕوونی کردەوە، کە زەوییەکان لە شوێنە ستراتیژییەکانی وەک (سماقۆک، ڕەزوک، ئاڵێ و کوچینە) دیاریکراون و پاش تەواوبوونی ڕێکارە یاساییەکان، ڕاستەوخۆ ڕادەستی خاوەنەکانیان دەکرێن.