لە رووداوێکی هاتوچۆدا لەسەر رێگای نێوان کەلار – کفری، ماتۆڕسوارێک کەوتە ژێر شۆفڵێک و دوای گەیاندنی بە نەخۆشخانە گیانی لەدەستدا. قوربانییەکە تەمەنی ١٧ ساڵ بووە.
بەڕێوەبەرایەتی هاتووچۆی گەرمیان رایگەیاند، ئەمڕۆ شەممە ١٦ـی ئایاری ٢٠٢٦، لەسەر رێگای ناحیەی سەرقەڵا بۆ کفری، لە گوندی ناساڵەح ماتۆڕسکیلێک و شۆفڵێک پێکیاندادا.
بەهۆی رووداوەکەوە، ماتۆڕسوارەکە بە سەختی برینداربووە و پاش گەیاندنی بە نەخۆشخانە گیانی لەدەستدا.
ئاماژە بەوەشکراوە، کە قوربانییەکە تەمەنی ١٧ ساڵە و تەرمەکەی رەوانەی پزیشکی دادی کەلار کراوە. لێکۆڵینەوە لەلایەن تیمی هاتووچۆوە لەبارەی چۆنیەتی رووداوەکەوە بەردەوامە.
ئەمە لەكاتێكدایە، كە هەر ئەمڕۆ لە ڕووداوێکی سەختی هاتووچۆدا لەسەر رێگای عەربەت – سەیدسادق پێنج کەس بریندار بوون.