کابینەی زەیدی متمانەی نیوەچڵی پێبەخشرا؛ چەندین پەرلەمانتار لە حەجن و 5 وەزارەت بە بەتاڵی مانەوە.
پەرلەمانی عێراق لە دانیشتنێکی پڕ لە دەنگەدەنگ و ناکۆکیدا، متمانەی بە کارنامەی وزاری و بەشێک لە کاندیدەکانی کابینە نوێیەکەی عەلی فالح زەیدی بەخشرا، بەڵام بەهۆی ململانێی سیاسی و نەبوونی ڕێژەی یاسایی تەواو، 5 وەزارەتی گرنگ بێ وەزیر مانەوە.
لە دەستپێکی دانیشتنەکەدا، پەرلەمانی عێراق بە زۆرینەی دەنگ متمانەی بە کارنامەی حکومەتەکەی عەلی زەیدی بەخشرا. دواتر پڕۆسەی دەنگدان بۆ کاندیدەکان دەستیپێکرد و ئەم ناوانە توانییان متمانە بەدەستبهێنن:
وەزارەتە سیادییەکان: فالح سارێ بە کۆدەنگی بووە وەزیری دارایی، و فۆئاد حوسێن وەک وەزیری دەرەوە لە پۆستەکەی مایەوە.
وەزارەتە خزمەتگوزارییەکان: باسم محەمەد خزر (نەوت)، عەلی سەعد وەهێب (کارەبا)، خالید شوانی (داد)، و سروە عەبدولواحید (ژینگە) متمانەیان پێبەخشرا. هەروەها وەزیرانی پیشەسازی، تەندروستی، گواستنەوە، بازرگانی، کشتوکاڵ و سەرچاوە ئاوییەکانیش دەنگی پێویستیان هێنا.
سەرەڕای تێپەڕبوونی زۆربەی وەزیرەکان، 5 وەزارەت بەهۆی ناکۆکی سیاسییەوە متمانەیان پێ نەبەخشرا:
وەزارەتی ناوخۆ: کاندیدکردنی (قاسم عەتا) گەورەترین کێشەی دروستکرد و بەهۆی ناڕەزایەتی توندی لایەنەکانەوە متمانەی پێ نەبەخشرا.
وەزارەتەکانی تر: کاندیدانی وەزارەتەکانی پلاندانان، خوێندنی باڵا، ئاوەدانکردنەوە و نیشتەجێکردن، لەگەڵ وەزارەتی ڕۆشنبیری شکستیان هێنا لە بەدەستهێنانی دەنگی پێویست.
یەکێک لە خاڵە جێگەی سەرنجەکانی دانیشتنەکە، چۆڵییەکی بەرچاوی کورسییەکانی پەرلەمانی عێراق بوو. بەپێی گرتە ڤیدیۆییەکان، چەندین پەرلەمانتار بە مەبەستی بەجێهێنانی فەریزەی حەج گەشتیان کردووە، ئەمەش وایکرد پڕۆسەی دەنگدان بۆ کاندیدە مشتومڕاوییەکان زۆر ئەستەم بێت و ڕێژەی یاسایی دەنگدان لاواز بێت.
بەم شێوەیە، عەلی زەیدی وەک سەرۆکوەزیران دەستبەکار دەبێت، بەڵام دەبێت لە دانیشتنەکانی داهاتوودا کاندیدی نوێ بۆ پۆستە بەتاڵەکان پێشکەش بکاتەوە تاوەکو حکومەتەکەی تەواو ببێت.