لە سنوورى زاخۆ سێ شوان پێکەوە لە ناو گۆمێکی ئاودا خنکان.
بەپێی زانیارییە سەرەتاییەکان، سێ شوان لە سنووری قەزای زاخۆ، لە کاتی شوانکارەیی و بەخێوکردنی ئاژەڵەکانیاندا، کەوتوونەتە ناو گۆمێکی ئاوەوە پێکەوە گیانیان لەدەستداوە.
ئەڤیندار عیزەت، وتەبێژی بەرگریی شارستانیی زاخۆ ڕایگەیاند: “ڕووداوەکە نزیک کاتژمێر 4:00ی پاشنیوەڕۆ لە گوندی (کوڵی) سەر بە ناحیەی باتێل لە پشت چیای بێخێرێ ڕوویداوە”.
ئاماژەی بەوەشکرد، کە بەپێی زانیارییە سەرەتاییەکان، هەر سێ خنکاوەکە پیاون، پیشەیان شوانە و هاووڵاتیی عەرەبن، کە لە کاتی کارەکەیاندا کەوتوونەتە ناو گۆمەکەوە.
وتیشی، ئەو سێ كەسە “(ت -ن-ع) 8 ساڵ/كوڕ و (ن – ع- م ) 40 ساڵ/باوك و (م- ع- م ) 25 ساڵ/ مام” بوون.
ئاشکرای کرد، کە لە پشت چیای بێخێرێ چەندین گۆمی ئاوی لێیە، و قوربانییەکان لەو شوێنە کەوتوونەتە ناو یەکێک لەو گۆمانە و پێکەوە گیانیان لەدەستداوە. تیمی مەلەوانان و فریاگوزاری بۆ دەرهێنانەوەی تەرمەکان و لێکۆڵینەوە لە چۆنیەتی ڕووداوەکە گەیشتوونەتە شوێنەکە.
