پسوولەی خۆراکی هەولێر هاووڵاتییان لە ڕێکارە نوێیەکانی سڕینەوەی ناو و جیابوونەوە ئاگادار دەکاتەوە.
بەڕێوەبەرایەتی ڕێکخستنی پسوولەی خۆراک لە پارێزگای هەولێر، ئاگادارییەکی نوێی بۆ ئەو هاووڵاتییانە بڵاوکردەوە کە مامەڵەی سڕینەوەی ناوی کۆچکردوو (وەفات) یان جیابوونەوەی هاوسەران (تەڵاق)یان هەیە. بەڕێوەبەرایەتییەکە داوا لە هاووڵاتییان دەکات بە مەبەستی ڕایی کردنی کارەکانیان، بەپێی ڕێنماییەکان سەردانیان بکەن یان خزمەتگوزارییە ئەلیکترۆنییەکان بەکاربهێنن.
سەبارەت بە مامەڵەی کۆچکردووان، بەڕێوەبەرایەتییەکە جەخت دەکاتەوە کە پێویستە هاووڵاتییان وەفاتنامەی ڕەسەن و کارتی نیشتمانیی کەسی کۆچکردوو، لەگەڵ پسوولەی خۆراکی پێشوو پێشکەش بکەن. ئەم هەنگاوە لە پێناو نوێکردنەوەی داتاکان و سڕینەوەی ناوی ئەو کەسانەیە کە کۆچی دواییان کردووە بۆ ئەوەی ناویان لە سیستەمەکەدا نەمێنێت.
لە لایەکی ترەوە، بۆ مامەڵەی جیابوونەوەی هاوسەران، مەرج کراوە کە تەڵاقنامەی ڕەسەن پێشکەش بکرێت و بەرواری ڕاستاندن (تصديق)ەکەی هی ساڵی ٢٠٢٦ بێت. هاوکات پێویستە کارتی نیشتمانیی کەسی جیابووەوە و پسوولەی خۆراک ئامادەبن؛ لەو چوارچێوەیەشدا بەڕێوەبەرایەتییەکە ئاسانکاری بۆ ئەو کەسانە کردووە کە پسوولەکەیان لەلا نییە و ئاماژەی بەوە داوە کە بەدەلێکیان بۆ چاپ دەکرێت.
بەڕێوەبەرایەتی ڕێکخستنی پسوولەی خۆراک ڕێگەیەکی ئاسانتریشی بۆ هاووڵاتییان دیاری کردووە، ئەویش ئەنجامدانی هەردوو مامەڵەکە بە شێوازی ئەلیکترۆنییە لە ڕێگەی ئەپلیکەیشنی تایبەت بە پسوولەی خۆراک. ئەم خزمەتگوزارییە ڕێگە دەدات هاووڵاتییان بەبێ سەردانیکردنی فەرمانگەکان کارەکانیان ڕایی بکەن، بەڵام جەختیش دەکەنەوە کە لە کاتی هەر گرفتێکدا، دەرگای بەڕێوەبەرایەتییەکە کراوەیە بۆ هاوکاریکردن و پێشکەشکردنی ئاسانکاری پێویست بە مەبەستی تەواوکردنی مامەڵەکانیان.