شارەزایەكی كەشناسی پێشبینییەكانی بۆ كەشوهەوای چەند ڕۆژی داهاتوو ڕادەگەیەنێت و ئاشكرای دەكات، كە زۆربەی كاتەكان باران دەبارێت و بەهۆی كەشی ساردەوە تەرزەی لەگەڵ دەبێت و لەناوچە شاخاوییەكان بەفر دەبارێت.
شاڵاو هیدایەت، شارەزای كەشناسی بۆ (خەڵك) ڕایگەیاند، چوار شەممە و پێنج شەممە (٨ – ٩ی نیسان): لووتکەی ناسەقامگیری نزمە پاڵەپەستۆیەکی سارد کاریگەری هەیە لەسەر ناوچەكانمان و بارانبارین بە شێوەی پچڕپچڕ لە زۆربەی ناوچەکان بوونی دەبێت کاریگەری بارانەکە لە شەوی پێنج شەممەدا زیاتر دەبێت.
ڕاشیگەیاند، ئەگەری بەهێزی تەرزە هەیە بەهۆی ساردی چینی سەرووی بەرگەهەوا، بەتایبەت لە ناوچە شاخاوییەکان. “لە لووتکەی چیا بەرزەکان سەروو ٢٥٠٠ مەتر ئەگەری بەفر بارین هەیە”.
بەپێی پێشبینی ئەو كەشناسە، هەینی و شەممە (١٠ – ١١ی نیسان) پێشبینی دەکرێ کەشەکە کەمێک جێگیر ببێتەوە، بەڵام بەهۆی شێی زۆر و گەرمبوونی زەوی، لە دوای نیوەڕۆیاندا تا ئێوارە تاوە بارانی بەهاری و هەورەبروسکە بە شێوەی ناوچەیی دروست دەبن واتا گشتگیر نابێت و پێشبینی دەکرێ کاریگەری هەورەکان لەسەر ناوچە شاخاوییەکان زیاتر بمێنێتەوە و نمە باران بەردەوام بێت.
سەبارەت بە ڕۆژانی یەک شەممە و دوو شەممە (١٢ – ١٣ی نیسان) وتی: ئاماژە بە هاتنی بڕێکی نوێ لە شێ دەکرێ بۆ سەر ناوچەکانمان لەهەردوو دەریای سورو ناوەڕاستەوە و پێشبینی دەکرێ حاڵەتێکی تری ناسەقامگیری تاوە باران و هەورە بروسک دروست ببێتەوە کە کاریگەری زیاتر لەسەر ناوچەکانی باکوور و ڕۆژهەڵاتی هەرێم دەبێت ناوچەکانی تر بەکاریگەری کەمتر .