ناتانیاهو: بۆ لاوازکردنی ڕژێم، هێڵەکانی ئاسن و پردەکانمان لە ناو جەرگەی ئێراندا کردە ئامانج.
بنیامین ناتانیاهو، سەرۆک وەزیرانی ئیسرائیل، ئەمڕۆ سێشەممە (٧ی نیسانی ٢٠٢٦) جەختی لە بەردەوامیی ئۆپراسیۆنە سەربازییەکان کردەوە بۆ تێکشکاندنی تواناکانی ڕژێمی ئێران و ئاماژەی بەوە کرد کە لە چەند کاتژمێری ڕابردوودا جومگە حەیاتییەکان و بنکە سەربازییەکانی ئەو وڵاتە کراونەتە ئامانج.
ناتانیاهو لە لێدوانێکی ڕۆژنامەوانیدا ڕایگەیاند “هێزەکانی ئیسرائیل بەردەوامن لە تێکشکاندنی (ڕژێمی تیرۆر) لە ئێران بە هێزێکی ڕو لە زیادبوون.” ئاشکراشی کرد کە هێرشەکانی ئەمڕۆ هێڵەکانی ئاسن (شەمەندەفەر) و چەندین پردی گرنگیان لە قووڵایی خاکی ئێراندا پێکاوە.
گرنگترین خاڵەکانی لێدوانەکەی:
تێکشکاندنی هێزی ئاسمانی: نەتانیاهوو ئاماژەی بەوە کرد کە دوێنێ هێزی ئاسمانی ئیسرائیل توانیویەتی چەندین هێلیکۆپتەر و فڕۆکە لەناو بنکەیەکی ئاسمانیی ئێراندا تێکبشکێنێت.
پەیام بۆ گەلی ئێران: جەختی کردەوە کە ئەم ئۆپراسیۆنانە دژی گەلی ئێران نین، بەڵکو ئامانجیان لاوازکردنی ئەو ڕژێمەیە کە “سەرکوتکاری” بەرامبەر گەلەکەی دەکات.
گۆڕانی هاوسەنگی هێز: نەتانیاهوو وتی: “نە ئێران و نە ئیسرائیل وەک پێشتریان لێ نایەتەوە”، و ئۆپراسیۆنەکان هاوسەنگی هێز لە ناوچەکەدا بە شێوەیەکی ڕیشەیی دەگۆڕن.
ئامانجە مەیدانییەکان:
هێرشەکان بە شێوەیەکی چڕ جەختیان کردووەتە سەر ژێرخانی گواستنەوە، لەوانە:
پردی هێڵی ئاسن لە کاشان.
وێستگەی شەمەندەفەر لە مەشهەد.
پردێکی سەر ڕێگایەکی خێرا نزیك لە تەورێز.
ئەم هێرشانە بوونەتە هۆی پەککەوتنی تەواوی ڕێڕەوە سەرەکییەکانی گواستنەوە لەناو ئێراندا.
هەڕەشەکانی ترەمپ و کاتی کۆتایی:
ئەم پەرەسەندنانە هاوکاتە لەگەڵ نزیکبوونەوەی کۆتایی ئەو مۆڵەتەی دۆناڵد ترەمپ، سەرۆکی ئەمریکا دیاری کردووە بۆ کردنەوەی گەرووی هورمز. ترەمپ بەیانی ئەمڕۆ هەڕەشەی کردووە کە ئەگەر تاران تا کاتژمێر ٨ی ئێوارە بەکاتی کەناراوەکانی ڕۆژهەڵاتی ئەمریکا (کاتژمێر ٣ی بەرەبەیانی سبەینێ چوارشەممە بەکاتی هەولێر و بەغدا) وەڵامی داواکارییەکانی نەداتەوە، “تەواوی شارستانییەتی ئێران دەسڕێتەوە”.