وەزارەتی بازرگانی عێراق ڕایگەیاند، لە چوارچێوەی پلانی دابینکردنی پێداویستییە خۆراکییەکان بۆ هاووڵاتییان، چوار ملیۆن فەردە ئاردیان ڕادەستی بریکارەکان کردووە، هاوکات چاودێرییەکان بەسەر پرۆسەی بەرهەمهێنان و دابەشکردندا چڕکراونەتەوە بۆ دڵنیابوون لە باشی و کوالێتی ئاردەکە.
موحسین محەمەد ئەلنامس، بەڕێوەبەری گشتی کۆمپانیای گشتی پیشەسازی دانەوێڵە سەر بە وەزارەتی بازرگانی عێراق لە ڕاگەیەندراوێکدا ڕایگەیاند: تیمەکانی چاودێری لە بەغدا 379 سەردانی مەیدانییان بۆ ئاشەکان و بریکارەکان ئەنجامداوە، کە تیایدا 144 سەرپێچی تۆمارکراوە.
باسی لەوەشکردووە: پشکنینی تاقیگەیی و تاقیکردنەوەی نانکردن ئەنجامدراوە بۆ دڵنیابوون لەوەی ئاردەکە لەگەڵ ستانداردە جیهانییەکان دەگونجێت.
هەروەها ئاماژەی بەوەش کرد، تیمەکانی کۆمپانیاکە بەردەوامن لە بەسەرکردنەوە مەیدانییەکانیان لە پارێزگاکانی: کەرکوک، سەڵاحەدین، دیالە، بابل، کەربەلا، نەجەف، دیوانییە، موسەنا، میسان و بەسرا، بە مەبەستی سەقامگیری پرۆسەی دابەشکردن و چاودێریکردنی کوالێتی بەرهەمەکان.
لە کۆتاییدا جەختی کردەوە کە ئەم هەوڵانە هاوکاتن لەگەڵ بەدواداچوون بۆ سکاڵای هاووڵاتییان و چارەسەرکردنیان، بەجۆرێک کە ببێتە هۆی دابینکردنی ئاردی باش بە شێوەیەکی ڕێکوپێک و پاراستنی سەقامگیری بازاڕ.