ترەمپ هۆشدارییەکی توند ئاراستەی ئێران دەکات: ئەگەر خۆتان ڕادەست نەکەن وێستگەکانی وزەتان تێکدەشکێنین.
دۆناڵد ترەمپ، سەرۆکی ویلایەتە یەکگرتووەکانی ئەمریکا، لە زنجیرە لێدوانێکی نوێدا هەڕەشەی توند لە کۆماری ئیسلامی ئێران دەکات و جەخت لەسەر بەهێزیی توانای سەربازی و ئابووری وڵاتەکەی دەکاتەوە.
ترەمپ لەبارەی سروشتی ململانێکان لەگەڵ تاران ڕایگەیاند: “پێم وانییە شوێنێک هەبێت لە ئێران نەیارتر بێت، ئەوان شەڕکەری بەتوانان و خەڵکێکی زۆر سەختن، بەڵام ئەم دوژمنە بەهێزە ئێستا هێندەی مانگێک لەمەوبەر بەهێز نییە و بەم زووانە ئەوەمان بۆ دەردەکەوێت.”
سەرۆکی ئەمریکا هۆشدارییەکی یەکلاکەرەوەی ئاراستەی بەرپرسانی تاران کرد و وتی: “ئێمە لە ناو ئێرانیشدا لەناویان دەبەین ئەگەر خۆیان ڕادەست نەکەن؛ هیچ وێستگەیەکی وزە یان پردێکیان بۆ نامێنێتەوە.” ئەم لێدوانە ئاماژەیەکی ڕوونە بۆ ئەوەی کە ئەمریکا ئامادەیە ژێرخانی مەدەنی و وزەی ئەو وڵاتە بکاتە ئامانج.
ترەمپ باسی لە بارودۆخی ناوخۆیی ئەمریکا کرد و وتی: “وڵاتەکەمان لە بارودۆخێکی نایابدایە، هەموو ڕیکۆردەکانمان لە بازاڕی پشکەکان و لە سوپاکەشماندا شکاندووە.”
سەبارەت بە ئۆپراسیۆنە سەربازییەکانی دوێنێ، ترەمپ ئاشکرای کرد کە توانیویانە دوو فڕۆکەوان ڕزگار بکەن، نەک یەک دانە. ئاماژەی بەوەش کرد کە ڕزگارکردنی یەکەمیان بۆ ماوەی ڕۆژێک بە نهێنی هێشتووەتەوە، کە ئەمەش بووەتە هۆی سەرکەوتنی زیاتری پڕۆسەکە و گەڕانەوەیان بە بێدەنگی.