سەرۆک وەزیرانی هەرێمی کوردستان و قەتەر ڕایانگەیاند، لەوەی میلیشیا و گرووپە لە یاسادەرچووەکان مایەی هەڕەشە و مەترسین و پێویستە حکومەتی عێراق کۆنترۆڵیان بکات.
ئەمڕۆ پێنجشەممە، مەسرور بارزانی، سەرۆکی حکومەتی هەرێمی کوردستان، لە پەیوەندییەکی تەلەفۆنیدا لەگەڵ سەرۆک وەزیران و وەزیری دەرەوەی قەتەر شێخ محەمەد بن عەبدولڕەحمان ئال سانی، پەرەسەندنەکانی دۆخی گشتی هەرێمی کوردستان و قەتەر و ناوچەکەیان تاوتوێ کرد.
حکومەتی هەرێم ڕایگەیاند، لە پەیوەندییە تەلەفۆنییەکەدا “هەردوولا سەرکۆنەی ئەو هێرشە تیرۆریستیانەی کرد کە دەکرێنە سەر هەرێمی کوردستان و قەتەر و نیگەرانی قووڵی خۆیان لە بەرانبەر پەرەسەندنی شەڕ و گرژییەکان لە ناوچەکە دەربڕی و جەختیان لە گرنگی پاراستنی ئاشتی و ئاسایش و سەقامگیری کردەوە”.
هەردوولا هاوڕابوون لەوەی میلیشیا و گرووپە لە یاسادەرچووەکان مایەی هەڕەشە و مەترسین و پێویستە حکومەتی عێراق کۆنترۆڵیان بکات.
سەرۆک وەزیران و وەزیری دەرەوەی قەتەر، جەختی لە پاراستنی ئاشتی و سەقامگیری کردەوە و ئاماژەی بەوە دا کە دەبێ هەڕەشە و مەترسییەکانیش لەبەرچا بگیرێن.
سەرۆکی حکومەت، هاوسۆزی هەرێمی کوردستانی لەگەڵ خەڵکی قەتەر دووپات کردەوە.
هەردوولا کۆک بوون لەسەر پێویستی بەردەوامبوونی پەیوەندی و هاوئاهەنگی بۆ تێپەڕاندنی ئاڵنگاری و ئاستەنگەکان.