عەبدولواحید دوکانی
لە زۆرێک لە شارەکاندا، ناوی پزیشکان تەنها وەک ناوێک لە تۆمارەکاندا دەمێنێتەوە، بەڵام لە سلێمانی، هەندێک ناو دەبنە یادەوەرییەکی زیندوو و بەشێک لە ویژدانی خەڵک.
ئەوانە ناوێکن کە هەرگیز لەبیر ناکرێن، چونکە پزیشکی بۆ ئەوان تەنها پیشە نەبوو، بەڵکو پەیامێکی مرۆیی بێگەرد بوو.
کۆچکردوو دکتۆر جەمال ئەحمەد ڕەشید، یەکێک بوو لەو کەڵەپیاوانەی کە بە ئاسانی دووبارە نابنەوە.
پزیشکی منداڵان بوو، بەڵێ، بەڵام لە چاوی خەڵکی شارەکەدا باوکێکی میهرەبان بوو پێش ئەوەی چارەسەرکار بێت.
هەرگیز پرسیاری لە توانای دارایی نەخۆش نەدەکرد، بەڵکو پرسیاری لە ئازارەکانیان دەکرد و بە سۆزەوە بۆ چارەسەریان هەوڵی لێبڕاوانەی دەدا.
پزیشکی بۆ ئەو تەنها سەرچاوەی بژێوی نەبوو، بەڵکو ڕێگەیەک بوو بۆ خزمەتکردنی خەڵک، بەتایبەت هەژاران و لێقەوماوان.
بۆ ساڵانێکی درێژ، ناوەکەی بە خێر و بەخشینەوە گرێدرابوو، تەنانەت دوای کۆچی دواییشی لە دڵی خەڵکدا بە زیندوویی مایەوە و بووە سیمبولی مرۆڤایەتی.
ناونانی نەخۆشخانەی منداڵان بە ناوی ئەوەوە، تەنها دەربڕینێکی بچووک و سادە بوو بۆ ئەو پێگە گەورەیەی لە دەروونی خەڵکی شارەکەدا هەیبوو.
بەڵام ئەوەی سلێمانی لە شارەکانی دیکە جیا دەکاتەوە، ئەوەیە کە شارەکە ماڵئاوایی لەم جۆرە پیاوانە ناکات بەبێ ئەوەی کەسانێک پێبگەیەنێت کە هەمان پەیام هەڵبگرنەوە.
ئەمڕۆ ناوی پزیشکی گەنج، دکتۆر ئاوات واژەیی، وەک درێژەپێدەرێکی ڕاستەقینەی ئەو ڕێچکە مرۆییە دەردەکەوێت.
هەرچەندە لە سەرەتای کاروانی پیشەییدایە، بەڵام ئامادەیی لە ژیانی خەڵکدا ڕەنگدانەوەی پێگەیشتووییەکی نائاسایی و هەستکردنێکی قووڵە بە بەرپرسیارێتی.
ئەوەندەی ئاگام لێیەو لێی نزیکم هەمیشە بە دەستی بەدەستنوێژەوە لە نەخۆشخانەی حکومی کار دەکات و ئەرکەکەی لێبڕاوانە جێبەجێدەکات و بێ جیاوازی خزمەت دەکات ، لە کلینیکی تایبەتی خۆشی پێشوازی لە نەخۆش دەکات، بەڵام تەنها بەوەوە ناوەستێت؛ زۆرجار دەستی هاوکاری بۆ ئەوچارەخوازانە درێژ دەکات کە پێویستیان پێیەتی و هاوکارییان دەکات لە تێچووی پشکنین و چارەسەرەکان، و هەندێکجاریش لە گیرفانی خۆی تێچووەکان لەئەستۆ دەگرێت.
ئەم دیمەنانە وێنەی ئەو پزیشکەمان بیردەخەنەوە کە پیشەکەی بە ئەرکێکی ئەخلاقی دەبینێت پێش ئەوەی تەنها وەزیفەیەک بێت.
لە مانگی ڕەمەزانی پیرۆزدا، ئەم ڕۆحیەتە بە ڕوونی دەردەکەوێت، کاتێک سەرپەرشتی دەسپێشخەرییە خێرخوازی و مرۆییەکان دەکات و تاوەکو کاتی پارشێو بەردەوام لە ماڵە بێ نەواکانی شار دەگەڕێت بۆ ئەوەی بگاتە لای نەخۆشە کەنەفتەکان، هەتیوان و هەژاران، بە ئامانجی کێشانی زەردەخەنە لەسەر لێویان لە بارودۆخە سەختەکاندا.
ئەم نموونانە تەنها حاڵەتی تاکەکەسی نین، بەڵکو ڕەنگدانەوەی کلتووری شارێکی گەورەی وەک سلێمانین کە بۆ هەموومان شانازیە.
شارێک کە بڕوای وایە پزیشکی پەیامە و مرۆڤ باڵاترین بەهایە.
بەدڵنییایەوە دەیان چیرۆکی تری ونی پزیشک و پیشەگەرەکانی تریش هەن لەم شارەدا کەبەهەمان شێوەو رۆحیەتەوە کار دەکەن و نادیارن ، کە ئەوەش نیشانەی ئەو زیندووییەی ئەم شارەیە کە لە بەرەبەیانی دروستبونیەوە ئاوا ناسراوە.
ئەمەی نوسیومە مەدح و سەنایەکی خاڵی نیە ، بەڵکو ئەرکەکەی هاوڕێی ئەزیزم د.ئاوات واژەیی قورستر دەکات بۆ ئەوەی ئەو نازناوە و ئەو رۆحیەتە درێژە پێبدات وە لێبڕاوانەترو دەست کراوەتر بەردەوام بێت .
سلێمانی بە مێژوو و کۆمەڵگاکەیەوە، جار لەدوای جار دەیسەلمێنێت کە دەتوانێت لە هەر نەوەیەکدا “دکتۆر جەمال”ێک بەرهەم بهێنێت.
ڕەنگە ناوەکان بگۆڕێن، بەڵام جەوهەرەکە هەر یەکە ، میهرەبانی، دڵسۆزی، و خزمەتکردنی خەڵک بەبێ بەرامبەر.
لە سەردەمێکدا کە پێوەرەکان بە خێرایی دەگۆڕێن، ئەم چیرۆکانە وەک بیرخستنەوەیەک دەمێننەوە کە چاکە ئەڵقەکانی ناپچڕێت، و ئەو مەشخەڵەی پیاوانی وەک دکتۆر جەمال ئەحمەد ڕەشید دایانگیرساند، تا ئێستاش گەشاوەیە و نەوەیەکی نوێی پزیشکان هەڵیانگرتووە، کە لە پێشەنگیاندا دکتۆر ئاوات واژەیی دەبینرێت.
بەم شێوەیە، جوانترین ڕاستی دەمێنێتەوە:
سلێمانی… دکتۆر جەمالی لێنابڕێ