سەرۆکی ئەمریکا ڕایگەیاند، ئێران هیچ بەرگریەکی نەماوە و دەتوانن زۆر بە ئاسانی دەست بەسەر دوورگەی خارکدا بگرن، دەشڵێت، 13 هەزار ئامانجمان لە ئێران پێکاوە.
دۆناڵد ترەمپ، سەرۆکی ئەمریکا بە فینانشاڵ تایمزی ڕاگەیاندووە: بڕوا ناکەم ئێرانییەکان هیچ بەرگرییەکیان هەبێت، دەتوانین زۆر بە ئاسانی دەست بەسەر دوورگەی خارکدا بگرین.
ئەوەشی وتووە: گفتوگۆکان لە ڕێگەی نێردراوە پاکستانییەکانەوە بە شێوەیەکی باش بەڕێوەدەچن و دەکرێت زۆر بە خێرایی ڕێککەوتنێک (سەودایەک) واژۆ بکرێت.
باسی لەوەشکردووە، تاوتوێی بژاردەی ئەنجامدانی ئۆپەراسیۆنی زەمینی لە ناو خاکی ئێران دەکەن بە مەبەستی دەستبەسەرداگرتنی نزیکەی 450 کیلۆگرام یۆرانیۆمی پیتێنراو.
“ڕەنگە دەست بەسەر دوورگەی خارکدا بگرین و ڕەنگە نەشیکەین، ئەمەش بەو مانایەیە کە ناچار دەبین بۆ ماوەیەک لەوێ بمێنینەوە”، ترەمپ وای وتووە.
دەشڵێت: 13 هەزار ئامانجمان لە ناو خاکی ئێراندا بۆردومان کردووە و نزیکەی سێ هەزار ئامانجی دیکەشمان ماوە.