وەزارەتی پێشمەرگە چەند بڕیارێكی بۆ ڕاگەیاندنەكان و ئەفسەران و هێزەكانی پێشمەرگە دەركرد و دەڵێت: لێدوان و وێنەگرتنی سەربازی قەدەغەیە و سەرپێچیکاران سزا دەدرێن
بەڕێوەبەرایەتی گشتی ڕاگەیاندن و هۆشیاری نیشتمانی لە وەزارەتی پێشمەرگە، زنجیرەیەک بڕیار و ڕێنمایی نوێی بۆ پاراستنی ئاسایشی زانیاری و سەربازی دەرکرد.
بەپێی ڕاگەیەندراوەکە، هاتنی دەزگاکانی ڕاگەیاندن بۆ ناو بارەگا سەربازییەکان و پێدانی هەر جۆرە لێدوان و زانیارییەک لەلایەن ئەفسەران و پێشمەرگەکانەوە بە هەموو شێوەیەک قەدەغەیە.
وەزارەتی پێشمەرگە هۆشداری دەداتە هێزەکانی کە “بڵاوکردنەوەی وێنە، ڤیدیۆ و زانیاری تایبەت بە سەنگەر و بارەگاکان لە تۆڕە کۆمەڵایەتییەکان قەدەغەیە”. هاوکات جەختکراوەتەوە کە هەر ئەفسەر و پێشمەرگەیەک پابەندی ڕێنماییەکان نەبێت، ڕووبەڕووی توندترین سزای سەربازی و کارگێڕی دەبێتەوە.
لە بەشێکی تری ڕاگەیەندراوەکەدا داوا لە پێشمەرگەکان کراوە “هەر پەیج و ئەکاونتێک بە ناوی پێشمەرگەوە زانیاری بڵاودەکاتەوە، لینکی بۆ وەزارەت بنێرن تا ڕێکاری یاساییان بەرامبەر بگیریتەبەر”.
ئاماژە بەوەشدراوە، کە لایەنە پەیوەندیدارەکان بە وردی چاودێری سۆشیال میدیا دەکەن بۆ تۆمارکردنی هەر سەرپێچییەک.