موجتەبا خامنەیی، ڕابەری نوێی ئێران ڕایگەیاند، تاوانکاران بەمزووانە باجی کوشتنی عەلی لاریجانی دەدەن.
موجتەبا خامنەیی لە پەیامێکدا بڵاویکردەوە، نەیاران با بزانن کە ڕشتنی ئەم خوێنانە لە پێناوی دارە بەتەمەن و بەهێزەکەی کۆماری ئیسلامیدا، تەنیا دەبێتە هۆی بەهێزتربوونی.
دەقی راگەیەندراوەکەی:
بسمالله الرحمن الرحیم
«ولاتَحسبَنَّ الّذینَ قُتِلوا فی سبیلِاللهِ اَمواتاً بَل اَحیاءٌ عِندَ رَبِّهِم یُرزَقون»
بەداخ و کەسەرێکی زۆرەوە، هەواڵی بەژان و پڕ لە ئازاری شەهیدبوونی بەڕێز دکتۆر عەلی لاریجانی، سکرتێری ئەنجومەنی باڵای ئاسایشی نیشتمانی و نوێنەری ڕێبەری لەو ئەنجومەنەدا، لەگەڵ کوڕە تێکۆشەرەکەی و ژمارەیەک لە هاوکارانی گەیشتە دەستم.
بەڕێزیان کەسایەتییەکی زانا، دووربین، هۆشمەند، پابەند و خاوەن ئەزموونی جۆراوجۆر بوون لە بوارە جیاجیاکانی سیاسی، سەربازی، ئەمنیی، کولتووری و بەڕێوەبردندا. نزیکەی پێنج دەیە ڕۆڵگێڕانی کاریگەر لە ئاستە جیاوازەکانی کۆماری ئیسلامیدا، سیمایەکی تایبەت و دیاری لێ دروست کردبوو.
بێگومان تیرۆرکردنی کەسایەتییەکی ئاوا، نیشانەی گرنگیی پێگەی ئەو و ڕق و کینەی دوژمنانی ئیسلامە بەرامبەری.
نەیاران با بزانن کە ڕشتنی ئەم خوێنانە لە پێناوی دارە بەتەمەن و بەهێزەکەی کۆماری ئیسلامیدا، تەنیا دەبێتە هۆی بەهێزتربوونی؛ بێگومان هەر خوێنێکیش، باجێکی هەیە کە بکوژانی تاوانباری ئەم شەهیدانە دەبێت بەمزووانە بیدەن.
من ئەم کۆستە گەورەیە لە هاوسەری بەڕێزیان و منداڵەکانی تری ئەو گەورەپیاوە و هەروەها سەرجەم خزم و کەسوکاریان، بەتایبەت جەنابی ئایەتوڵڵا ئامولی لاریجانی، سەرەخۆشی دەکەم و لە دەرگای خوای گەورە داوای بەرزکردنەوەی پلە و پایەی ئەو کۆچکردووانە دەکەم.
سەید موجتەبا حسێنی خامنەیی