یەکێتیی ئەوروپا پاکێجێکی نوێی سزای بەسەر ١٩ بەرپرس و دامەزراوەی ئێراندا سەپاند.
یەکێتیی ئەوروپا ڕەزامەندی نیشان دا لەسەر سەپاندنی پاکێجێکی نوێی سزا بەسەر کۆماری ئیسلامیی ئێراندا، کە ئامانج لێی ئەو کەسایەتی و لایەنانەیە کە تێوەگلاون لە پێشێلکارییە قورسەکانی مافی مرۆڤ و سەرکوتکارییە ناوخۆییەکان.
کایا کالاس، بەرپرسی سیاسەتی دەرەوەی یەکێتیی ئەوروپا، ئەمڕۆ چوارشەممە (١١ی ئاداری ٢٠٢٦) لە هەژماری فەرمی خۆی لە تۆڕی کۆمەڵایەتی “ئێکس” ڕایگەیاند، باڵیۆزانی وڵاتانی ئەندام لە یەکێتییەکەدا سزای نوێیان بەسەر ١٩ بەرپرس و دامەزراوەی ئێراندا پەسەند کردووە. کالاس جەختی لەوە کردەوە کە “یەکێتیی ئەوروپا بەردەوامە لە لێپرسینەوە لە ئێران” و پارێزگاری لە بنەماکانی مافی مرۆڤ دەکات.
سزاکانی ئەمجارە بەهۆی تێوەگلانی ئەو بەرپرسانە لە “پێشێلکاریی قورسی مافەکانی مرۆڤ و سەرکوتکاریی ناوخۆیی” دەرکراون. بڕیارە وردەکاریی ناوەکان لە “ڕۆژنامەی فەرمیی یەکێتیی ئەوروپا” بڵاو بکرێنەوە، بەڵام جۆری سزاکان بریتین لە:
بلۆککردنی سەروەت و سامان: دەستگرتن بەسەر هەموو ئەو دارایی و موڵکانەی کە ئەو کەس و لایەنانە لە وڵاتانی ئەوروپا هەیانە.
قەدەغەی گەشتکردن: ڕێگری کردن لە چوونە ناو خاکی هەر وڵاتێکی ئەندام لە یەکێتیی ئەوروپا بۆ ئەو ١٩ بەرپرسە.
بەرپرسی سیاسەتی دەرەوەی ئەوروپا ئاماژەی بەوە کرد، لە کاتێکدا کە گرژییەکان بەردەوامن، یەکێتییەکە چاوپۆشی لەو کەسانە ناکات کە بەرپرسیاری سەرەکیی سەرکوتکارییەکانن. کایا کالاس پەیامێکی ڕاستەوخۆی ئاراستەی بەرپرسانی تاران کرد، و وتی”ئەمە پەیامێکە بۆ تاران بۆ سەلماندنی ئەوەی کە داهاتووی ئێران ناتوانرێت لەسەر بنەمای سەرکوتکردن بونیاد بنرێت.”
ئەم هەنگاوە وەک نوێترین فشاری دیپلۆماسی و ئابووریی یەکێتیی ئەوروپا دەبینرێت بۆ سەر حکومەتی تاران، بە ئامانجی ناچارکردنی کۆماری ئیسلامی بۆ ڕێزگرتن لە مافە بنەڕەتییەکانی هاووڵاتییانی و ڕاگرتنی سەرکوتکارییەکان.