بانگەوازێک بۆ یادکردنەوەیەکی جیاوازو شکۆمەندانەی نەورۆزی سەدە

ئەبوبەکر عەلی

بۆهەموو ئەوکەس وناوەندانەی پەرۆشی یەکبوونی نەتەوەیی وچارەنووس وئایندەی نەتەوەکەیانن

بەرێزان.. هەروەک لای هەمووان ڕوونە، نەورۆزی ئەمساڵ، هاوکاتە لەگەڵ، سەرەپێچێکی مێژوویی هەستیاری خۆرهەڵاتی ناوەراست، دۆزی کورد، بومەلەرزەیەکی جیۆسیاسی گەورەو تەکاندەر لەناوچەکەدا، هەروەها هەوڵدان، بۆ شکڵپێدانەوەیەکی نوێی هەرێمەکە، گۆڕانی هاوکێشەو هاوپەیمانییەکانی ناوی ودیاریکردنی چارەنووسی نەتەوەکەمان بۆ قۆناغی ئایندە ورەنگە دەیان ساڵی تر. لەدۆخێکی لەم جۆرە ئاوارتەو هەستیارو چارەنووسسازدا، چاوەرێ دەکریت، هەمووان بەوپەری غەمخۆری وهووشیارییەوە لەسەر هێڵ بین، هەوڵدەین یادکردنەوەی نەورۆزی ئەمساڵ، نائاسایی وجیاواز وئامانجدانەتر بێت، چالاکییەکان لۆکاڵی ولەیەکتر دابڕاو نەبن، لانی کەم ڕۆژی نەورۆز( دەکرێت چالاکییەکە بخرێتە ڕۆژی پێشووتریش) یادکردنەوەکە سەراسەری و شکۆمەندو نەتەوەیی بێت، گریدانەوەی چالاکی و خەمە نیشتیمانییەکانی هەرپارچەیەک، بەم جەژن وبۆنە نەتەوەییەوە، بکەونە دوای ئەو، بەهەمان ڕۆحییەتی یەکتر تەواوکردنی نەتەوەیش، بخەمڵێن وئەنجام بدرێن.

بۆ ئەم مەبەستەش ،ئەم هەنگاوو خاڵانەی خوارەوە بە گرنگ دەبینین وپێشنیار دەکەین:

١- بوونی دەستەیەکی سەرپەرشتیارو سازدەری نەتەوەیی لەسەرئاستی کۆی پارچەکانی کوردستان، ڕەوەندی کوردی وکوردستانی لەدەرەوە و بەتایبەتیش خۆرئاوا.

( لەم ڕووەوە گرنگە کوردەکانی قەوقاز، خۆراسان، پاکستان و ئەفغانستان، لوبنان وئوردن و زۆر شوێنی تر لەبیر نەکرێن)

٢- یادەکە بەخۆپیشاندانی گەورەی ملیۆنی

هاوکات زیندوو ڕابگیرێت.

٣- ئامانجی سەرەکی لەئەنجامدانی ئەم کار و چالاکییە هاوکاتە نەتەوەییە، ئەم خاڵانەی خوارەوە بێت:

ا- درێژەدان و قووڵکردنەوەی ئەوگیان وهووشیارییە نەتەوەییەی، خۆپیشاندانەکان بۆ پشتگیریکردن لەرۆژئاوا بەدیان هیناوە.

ب- دووبارە نیشاندانەوەیەکی یەکگرتووانەی کورد بۆ ناوچەکەو جیهان، وەک چوارەمین نەتەوەی گەورەی خۆرهەڵاتی ناوەراست و گەورەترین نەتەوەی بێ دەوڵەت لەجیهاندا، هاوکات خاوەنی دۆزێکی نەتەوەیی دادپەروەرانەی چارەسەر نەکراو.

ج- پێویستیی، ئامادە بوون وبەشداریکردنی کوردو ناسیۆنالیزمەکەی، لە پرۆسەی دووبارە دارشتنەوەی نەخشەی ناوچەکەو دیاریکردنی چارەنووسی خۆیدا و کۆتایهێنان بە سەردەمی فەرامۆشکردنی و ئاسان نەبوونی ئەم بژاردە دوای گۆرانکارییەکان، کارەساتباریی دۆخی ڕابردوو و بێدار بوونەوەی ستراتیژیی کورد.

٤- ناونیشانێکی گشتی بۆ نەورۆزی ئەم ساڵ و زیندووکردنەوەی یادەکە دیاریبکرێت، هاوشێوەی( نەورۆزی یەکبوونی نیشتیمانی هەرپارچەیەکی کوردستان ویەکترتەواوکردنی نەتەوەیی) ( نەورۆزی هەڵسانەوەی نەتەوەیی ودیاریکردنی مافی چارەنووس)

( بەرخۆدانی مەزن لەپێناو ڕزگاری ومافی چارەنووسدا)

(نەورۆزیی برایەتی گەلان و سەربەخۆیی کوردستان)… هتد

٥- ڕێککەوتن لەسەر کۆمەڵێ درووشمی هاوبەش بۆئەوەی لەڕێپێوانەکەدا بەرزبکرێنەوە لەوانەش:

. کورد لەهەر کوێیەکی دنیادا بێت هاوچارە نووسە.

سەردەمی نادیدەگرتنی کوردو مافەکانی بەسەر چووە.

. قووڵکردنەوەی گیانی هاوچارەنووسی ویەکبوونی نەتەوەیی، دەستەبەری گەورەی ئایندەمانە.

. بەبێ هەڵسانەوەو ڕزگاربوونی کورد، ڕۆژهەڵاتی ناوەراستی نوێ لەدایکنابێت.

. برایەتی وبەرژەوەندی ڕاستەقینەی گەلانی ناوچەکە، وا لەگرەوی، چارەسەرکردنی دۆزی کوردا.

.بەیەکبوون ویەکگرتوویی بەسەر کۆسپەکاندا سەردەکەوین یاخود بەئامانجەکانمان دەگەین.

. پێکهاتەکانی کوردستان بەشێکی ڕەسەنی گەلی کوردستانن.

. چارەسەرکردنی دۆزی کورد، ناوچەکە دەخاتەوە سەر ڕەوتی گەشەکردنی سرووشتیی خۆی.

. کورد لەجیاتی جیهان جەنگی تیرۆری کرد، پێویستە جیهانیش پارێزگاری لێبکات وپشتیوانی بەدیهێنانی مافەکانی بێت.

. باج هەرچی بێت، کورد دەستبەرداری مافەکانی نابێت.

. هەڵسانەوەی کورد لەخۆرهەڵاتی ناوەراستدا دەستکەوتێکی ستراتیژیی ژیاری و ئیسلامی وئەخلاقیە.

. حیزب دەبێت ئامرازی خزمەتکردن وهەوێنی یەکییەتی نەتەوەیی بێت نەک ئامانج.

.چیتر کورد ڕازی نابێت لەجیاتی ئەو بریار لەچارەنووسی بدرێت.

.. هتد

٦- دیاریکردنی هەندێ کورتە دووشم بۆ وتنەوە لەوانەش:

. هەتا هەتا هەتایە

کورد لەگەڵ یەک برایە

.نەورۆزی بەرخۆدانە

مەبەستیش کوردستانە

.لاوان هاتوونە مەیدان

بۆ ڕزگاری کوردستان

. هەتا کوردێ بمێنێ

واز لەخەبات ناهێنی

. ئێستاکە کورد بێدارە

دژی زۆرو زۆردارە

.ئاسۆمان ڕوون دەنوێنێ

سبەی مژدە دەهێنێ

. حیزب ئامرازە ئامراز

کوردستانیبوون ڕێباز

…. هتد

٧- لەم ڕێپێوانە نەتەوەییەدا، تەنها ئاڵای کوردستان هەڵبدرێت. گەر لەشوێنێک دەرەتانی ئەوە نەبوو، ئاڵای حیزبیی وناوچەیی بەکارنەیەت.

٨- خوێندنەوەی بەیاننامەیەکی نائاسایی هاوبەش لەکۆتایی ڕێپێوانەکاندا، بەناوی خودا دەست پێبکات، بەزمانەکانی کوردی، ئینگلیزی، عەرەبی وتورکی وفارسی بخوێنرێتەوە( مەرج نییە لەهەموو شوێنێک بەهەموو زمانەکان بخوێنرێتەوە).

بەیاننامەکە هاوشێوەی مانیڤێستێک و خستنەڕووی یاداشتی سەدە بێت. چەندین برگە لەخۆبگرێت لەوانەش:

ئاوردانەوە بۆ سەدەی سووکایەتیپێکردن و کارەساتی کورد( سەدەی بیستەم) ، گۆرانکارییەکانی ئێستا، باجەکانی چارەسەر نەکردنی دۆزی کورد بەسەر کۆی ناوچەکەدا، ڕاگەیاندی بانگەوازی ئاشتی و برایەتی بۆ گەلانی ناوچەکە، بۆئەوەی سوود لەم دەرفەتە وەربگیرێت، دۆزی کورد چارەسەر بکرێت، ئەم لاوازییە ستراتیژییەی ناوجەکە کۆتایی پێبێت، ئەوەش بە بەرژەوەندییەکی ئیسلامی وهاوبەشی گەلانی ناوچەکەو سەرپێکەوتنی دەوڵەت وگەشەکردن ویەکتر تەواو کردنی ئابووری وسیاسی نەتەوە دراوسێکان و وڵاتەکانیان دابنرێت.

بانگەواز بۆ قووڵکردنەوەی گیانی یەکبوونی نەتەوەیی، کۆتایهێنان بەناکۆکییە تەقلیدی وحیزبییە دژە نەتەوەییەکان و خەمڵاندنی ستراتیژێکی نەتەوەیی یەکگرتوو، کۆنفرانس ویەکتیەتی نیشتیمانیی هەرپارچەیەک ویەکتر تەوا کردنی نەتەوەیی،

بەیاننامەکە ئاراستەی وڵاتانی خاوەن نفوز، کۆرو دامەزراوە نێو دەوڵەتیەکان، کۆمکاری عەرەبی و هاوکاری ئیسلامی ودەوڵەت وگەلانی ناوچەکەو ئازادیخوازانی جیهان و ڕۆڵەکانی نەتەوە بکرێت وداوای پشتیوانیان لێ بکرێت بۆ تێگەیشتنێکی قووڵتر بۆو کارەساتەی بەسەر کوردا هاتووە، پشتیوانیکردنیان لەپێناو ڕزگاربوون لە چەوساندنەوەو جیاکاری و شادبوونی ئەم نەتەوە ڕەسەنە بەمافی چارەنووس.

ستایشی هووشیار بوونەوەو گیانی هاوچارەنووسی کوردی تیدا بکرێت، سوود لەوەش وەربگیرێت بۆ زیاتر گەورە نیشاندان و زیندوێتی دۆزی کوردو مەترسی گوێ نەگرتن لەم نەتەوە و بەچارەسەر نەکراوی هێشتنەوەی کێشەکەی. ئاماژە بەپێکهاتەکانی گەلی کوردستان وهەڵوێستی چەسپاوی کورد دەربارەی ماف وئازادییەکانیان وەک بەشێکی گرنگی گەلی کوردستان بکرێت. سوپاسی ئەو ناوەندو کەس ولایەنانە بکرێت یارمەتی کوردیان داوەو دەیکەن، ئاسۆی ئایندە ومژدەوئەرکە هاوبەشە تەواو نەکراوەکان بخرێنەوە ڕوو.