کۆمپانیای “زد ئێف”ی ئەڵمانی، کە تایبەتمەندە لە دابینکردنی پارچەی ئۆتۆمبێل و بەدەست تەنگژەی داراییەوە دەناڵێنێت، گرێبەستێکی چەند ملیار یۆرۆیی لەگەڵ کۆمپانیای “بی ئێم دەبلیو”ی هاونیشتمانی واژۆ کرد.
کۆمپانیاکە، کە بنکەکەی لە شاری فرێدریشسهافنە لەسەر دەریاچەی کۆنستانس، ڕایگەیاند کە ناوەڕۆکی ڕێککەوتنەکە بریتییە لە پەرەپێدان و دابینکردنی گێڕی ئۆتۆماتیک، ئاماژەی بەوەش کرد کە ماوەی گرێبەستەکە تا نزیک ساڵی 2040 درێژ دەبێتەوە.
وتەبێژێک بەناوی “زد ئێف” ڕایگەیاند کە ئەم گرێبەستە گەورەترین داواکارییە کە “بەشی تەکنەلۆژیا کارەباییەکان” لە ساڵی ٢٠١٩وە بەدەستی هێنابێت. ئەم بەشە سەرەکییە، کە بزوێنەری سووتانی ناوەکی لەگەڵ بزوێنەری کارەبایی و هایبرید پەرەپێدەدات و بەرهەمی دەهێنێت، لە چەقی پرۆسەی دووبارە ڕێکخستنەوەدایە کە کۆمپانیاکە بەخۆیەوە دەبینێت.
وتەبێژەکە ئاماژەی بەوەش کرد کە هەموو کەرتەکانی کارکردن سوود لەم ڕێککەوتنە وەردەگرن، لە هەمان کاتدا جەختی کردەوە کە گرێبەستەکە کاریگەری لەسەر پلانی کەمکردنەوەی هەلی کارەکان نابێت کە پێشتر بڕیاری لێدراوە.
کۆمپانیاکە بە نیازە تا کۆتایی ساڵی ٢٠٢٨ نزیکەی ١٤ هەزار هەلی کار لە ئەڵمانیا نەمێنێت، جێی ئاماژەیە کە کۆمپانیاکە لە ئێستاوە دەستی کردووە بە لادانی هەزاران فەرمانبەر و کاتژمێری کاری زۆرێک لە کارمەندانیشی کەم کردووەتەوە.
ئەم کۆمپانیایە بە یەکێک لە گەورەترین دابینکەرانی ئۆتۆمبێل لە جیهاندا دادەنرێت، کە نزیکەی ١٦١ هەزار و ٦٠٠ کەس لە ١٦١ شوێنی جیاواز لە ٣٠ وڵاتی جیهاندا کاری تێدا دەکەن. داهاتی کۆمپانیاکە لە ساڵی ٢٠٢٤دا گەیشتە نزیکەی ٤١.٤ ملیار یۆرۆ.
کۆمپانیای “زد ئێف” بە نیازە لە ١٩ی ئاداری ساڵی ٢٠٢٥ ئەنجامە داراییەکانی خۆی بڵاو بکاتەوە.