وتەبێژی وەزارەتی ناوخۆی عێراق ڕایدەگەیەنێت، لیژنەی لێكۆڵینەوە لە هێرشەكەی سەر كێڵگەی غازی كۆرمۆر كارەكانی تەواو كردووە و لە چەند رۆژی داهاتوودا ئەنجامەکانی بڵاودەکرێتەوە.
عەمید میقداد میری، بەڕێوەبەری راگەیاندن و پەیوەندییە گشتییەکان لە وەزارەتی ناوخۆی عێراق، بە ئاژانسی”شەفەق نیوز”ی وتووە: لیژنەی لێکۆڵینەوە لە هێرشەکەی سەر کێڵگەی نەوتی کۆرمۆر لە سلێمانی کارەکانی تەواوکردووە، لە چەند رۆژی داهاتودا ئەنجامەکانی بڵاودەکرێتەوە.
ڕاشیگەیاندووە، لیژنەی بەدواداچوون بۆ رووداوی کۆرمۆر سەردانی پارێزگاری سلێمانی و كێڵكگەیان کرد، بە ئامادەبونی سەرجەم ئەندامانی لیژنەکە، فەرماندەی گشتی هێزە چەکدارەکانیش لە نزیکەوە چاودێری ئەدای لیژنەکە و کارەکانی دەکات.
ئاماژەی بەوەشکردووە، لیژنەکە کارەکانی تەواوکردووە و لە قۆناغێكی پێشکەوتودایە، ئەنجامی لێکۆڵینەوەکان دوای پەسەندکردنی رادەگەیەنرێت.
جەختیكردووە: لە چەند رۆژی داهاتوودا ئەنجامی لێکۆڵینەوەکان لە ڕووداوەکەی کۆرمۆر بڵاودەکرێتەوە، هەر ئەنجامێك یان لێدوانێک لەم کاتەدا درابێت نادروستە.