دەقی دەستپێشخەریەکەی یەکگرتووی ئیسلامی کوردستان:
بۆ بەڕێزان: لیستە براوەکانی هەڵبژاردنی پەرلەمانی عێراق
السالم علیکم ورحمة الله ..
لە ڕوانگەی بەرپرسیارێتی نیشتمانی و هەستیاری و پێویستی قۆناغەکە، لەپێناو بەهێزکردنی پێگەی هەرێم و خزمەتکردنی هاوڵاتیانی کوردستان و چارەسەرکردنی کێشە کەڵەکەبوەکانی نێوان هەرێم و عێراق، بۆ ئەم مەبەستە یەکگرتوی ئیسلامی کوردستان ئەم دەستپێشخەریەتان پێشکەش دەکات :
یەکەم: ئەنجامدانی کۆبونەوەیەکی هاوبەش لە سەر ئاستی مەکتەبی سیاسی لایەنە براوەکانی هەڵبژاردن و پێکهێنانی لیژنەیەکی باڵا بۆ داڕشتنی نەخشەڕێگایەک بۆ چۆنیەتی گفتوگۆکردن و پاراستن و دابینکردنی دەستکەوتەکان و بەدەستهێنانی بەرکەوتەکانی هەڵبژاردن و مافە ڕەواکانی هەرێمی کوردستان .
دوەم: پێکهێنانی لیژنەیەکی هاوبەش لە پەرلەمانتاران بۆ بەدواداچون و جێبەجێکردنی نەخشەڕێگاکە، بە سود وەرگرتن لە پسپۆڕانی یاسایی و بوارەکانی تر .
سێیەم: پێکهێنانی چوارچێوەیەکی هەماهەنگی بۆ بڕیار وەرگرتن دەربارەی پرسە نیشتمانی و نەتەوەییەکان .
چوارەم: هەماهەنگیکردن لەگەڵ نەتەوە یەکگرتوەکان و لایەنە نێودەوڵەتییەکان بۆ دەستەبەرکردنی مافەکانی هەرێم لە چوارچێوەی دەستوری عێراقیدا.
پێنجەم: دیاریکردنی هێڵە سورەکانی هەرێم وەک (موچە و بودجە، ماددەی 140، یاسای نەوت و غاز، پێشمەرگە) و کردنیان بە مەرج بۆ پاڵپشتیکردن و دەنگدان بە سەرۆک وەزیرانی داهاتوی عێراق.
شەشەم: هەوڵدان بۆ گێڕانەوەی سەرجەم شایستە داراییەکانی هاوڵاتیانی هەرێمی کوردستان .
لەگەڵ ڕێزماندا …
مەکتەبی سیاسی یەکگرتوی ئیسلامی کوردستان 25/11/2025