فەڕەنسا هۆشداری بە ئیسرائیل دەدات و دەڵێت”ئیسرائیل دەبێت لە بەرزاییەکانی جۆلان بکشێتەوە و ڕێز لە سەروەری سووریا بگرێت”.
بەپێی وتەبێژی وەزارەتی دەرەوە، پاسکال کۆنڤافرو، کە پاڵپشتیی پاریسی بۆ واژۆکردنی ڕێککەوتننامەیەکی ئەمنی لە نێوان ئیسرائیل و سووریادا دەربڕیبوو…
فەڕەنسا ئەمڕۆ پێنجشەممە داوای لە حکومەتی ئیسرائیل کرد کە لە بەرزاییەکانی جۆلانی سووریای داگیرکراو بکشێتەوە و ڕێز لە سەروەری دیمەشق بگرێت.
ئەمەش لە لێدوانێکدا هات کە پاسکال کۆنڤافرو، وتەبێژی وەزارەتی دەرەوەی فەڕەنسا، لە کۆنفرانسێکی ڕۆژنامەوانیدا لە بارەگای وەزارەتەکە لە پایتەختی پاریس ئەنجامی دا.
کۆنڤافرو وتی “بە نیگەرانییەکی زۆرەوە چاودێری پێشهاتەکانی بەرزاییەکانی جۆلان دەکەین، و فەڕەنسا داوای کشانەوەی سوپای ئیسرائیل لەو ناوچەیە و ڕێزگرتن لە سەروەری سووریا و یەکپارچەیی خاکەکەی دەکات.”
وتەبێژەکە پاڵپشتیی پاریسی بۆ واژۆکردنی ڕێککەوتننامەیەکی ئەمنی لە نێوان ئیسرائیل و سووریادا دەربڕی، کە ئامانجی دامەزراندنی پەیوەندی دراوسێیەتییە و پاڵپشتی سەقامگیری ناوچەیی و گواستنەوەی ئاشتییانە لە سووریادا دەکات.
هەروەها جەختی لەوە کردەوە کە هەر بڵاوبوونەوەیەکی سەربازی لە ناوچەی نێوان دوو وڵاتەکە پێشێلکردنی “ڕێککەوتننامەی دابڕاندنی هێزەکان”ە کە لە ساڵی ١٩٧٤ لە نێوان سووریا و ئیسرائیل واژۆ کراوە.
ئیسرائیل لە ساڵی ١٩٦٧ەوە بەرزاییەکانی جۆلانی سووریای داگیرکردووە، و لە کۆتاییەکانی ساڵی ٢٠٢٤دا سوودی لە ڕووداوەکانی ڕووخانی ڕژێمی بەشار ئەسەد وەرگرت بۆ فراوانکردنی ڕووبەری داگیرکارییەکانی.