شارەوانی سلێمانی ناوی ئەو خانەنشینانە بڵاودەکاتەوە کە زەوییان بەسەردا دابەشکراوە
سەرۆکایەتیی شارەوانیی سلێمانی ئەمڕۆ پێنجشەممە، ٢٠ی تشرینی دووەمی ٢٠٢٥، ئاگادارییەکی گرنگی بۆ ئەو خانەنشین و کەسوکارانە بڵاوکردەوە کە لە مانگی ئابی ئەمساڵدا زەوییان بەسەردا دابەشکراوە.
شارەوانی سلێمانی دەڵێت، بەهۆی زۆری سەردانیکەران، سەرۆکایەتیی شارەوانی هەڵدەستێت بە بڵاوکردنەوەی ناوی سەرجەم ئەو کەسانەی کە سوودمەند بوون.
ئاگادارییەکە داوا لە سوودمەندان دەکات، کە سەردانی بەڕێوەبەرایەتیی خانەنشینی سلێمانی بکەن، بۆلای لیژنەی پێکهاتوو بچن بە مەبەستی تەواوکردنی ڕێکارە پێویستەکان.
ئەم ڕێکارانە بۆ ئەوەیە کە بەڕێوەبەرایەتیی خانەنشینی سلێمانی بتوانێت بە نووسراوی فەرمی ئاڕاستەی سەرۆکایەتیی شارەوانی سلێمانی بکات بۆ گرتنەبەری ڕێوشوێنی کۆتایی.