سوپای پاسداران دەستی بەسەر کەشتییەکی نەوتهەڵگردا گرتووە و ئەمریکاش دەڵێت چاودێری دۆخەکە دەکەن.
ئەمڕۆ هەینی، هێزی دەریایی ئەمریکا ڕایگەیاند چاودێری بارودۆخی کەشتییەکی گواستنەوەی نەوت دەکات لە نزیک ئێران لە ڕێڕەوی خۆی لایداوە.
کەشتییەکە بە ناوی “تەڵارا” کە ئاڵای دوورگەکانی مارشاڵی هەڵگرتووە و باری 73,371 تۆن هەڵدەگرێت، ڕۆژی پێنجشەممە بەندەری حومرییەی لە ئیمارات بەجێهێشت و بەرەو سەنگافورە بەڕێکەوت. لە کاتژمێر 08:20 بەیانی بە کاتی ناوخۆیی، کەشتییەکە لەناکاو لە ڕێڕەوی خۆی لایدا لە کاتی تێپەڕبوونی بە کەنداوی عوماندا، لە دووری 22 میل لە ڕۆژهەڵاتی خورفەکان.
دوایین ئاماژەی سیستەمی ناساندنی ئۆتۆماتیکی کەشتییەکە لە کاتژمێر 12:06 پەخشکرا و ئاراستەکردنی بەرەو ئاوەکانی هەرێمی ئێران نیشانداوە. سەرچاوەیەکی ئەمنی ڕایگەیاند کە فڕۆکەیەکی بێفڕۆکەوانی هێزی دەریایی ئەمریکا لە شوێنی ڕووداوەکە بووە و چاودێری ڕووداوەکەی کردووە و هیچ ڕاپۆرتێک لەبارەی زیانی گیانی یان ماددی تۆمارنەکراوە.
چەند سەرچاوەیەک بە ئاژانسی ڕۆیتەرزیان ڕاگەیاندووە کە سوپای پاسدارانی ئێران دەستی گرتووە بەسەر کەشتی “تەڵارا” و بەرەو کەناراوەکانی ئێرانی بردووە، بەڵام تائێستا هیچ لێدوانێکی فەرمی لەلایەن ئێرانەوە نەدراوە.