هاوسەرۆکی گشتیی دەم پارتی، تولای هاتیمئۆغوڵڵاری و پەرلەمانتاری ئیستانبوڵی پارتەکە، جەنگیز چیچەک، لە گرتووخانەی ئەدیرنە سەردانی هاوسەرۆکی پێشووتری هەدەپە، سەڵاحەددین دەمیرتاش-یان کرد.
سەردانەکەی هاتیمئۆغوڵڵاری و چیچەک بۆ گرتووخانەکە بۆ دیداری دەمیرتاش، نزیکەی دوو کاتژمێری خایاند.
هەروەها هاتیمئۆغوڵڵاری و چیچەک چاویان بە سەرۆکی پێشووی گەورەشارەوانی دیاربەکر، سەلچوق مزیراکلی کەوت، و دوای سەردانەکە هاتیمئۆغوڵڵاری بۆ ڕۆژنامەنووسان دووا و، ئاماژەی بەوە کرد، کە بڕیاری دادگای مافی مرۆڤی ئەورووپا سەبارەت بە دەمیرتاش یەکلا کەرەوەیە، و چاوەڕوانن هەرچی زووە بڕیارەکە جێبەجێ بکرێت.
ئاماژەی بەوەشدا، بەجێبەجێکردنی ئەم هەنگاوە بەربەستێکی گەورە لادەچیت، و ئەمە دەبێتەهۆی کرانەوەی ڕێگای پرۆسەی ئاشتیی و سیاسەتی دیموکراسی لە تورکیا.
هاتیمئۆغوڵڵاری ئەوەیشی خستەڕوو، کە ئەگەر سیاسەتمەداران ئازاد بن، ئەوا باوەڕیان بەوەی کە زەمینەیەکی دیموکراسی ڕاستەقینە دەست پێدەکات و زیاتر دەبێت.
دەمیرتاش لە ساڵی 2016ەوە لە زینداندایە و دۆسیەکەی بە یەکێک لە دۆسییە سیاسییە گرنگەکانی تورکیا دادەنرێت، و چەندین تۆمەتی ئاڕاستە کراوە، لەوانە “پڕوپاگەندەی لەبارەی پارتی کرێکارانی کوردستان (PKK)”، “سووکایەتیکردن بە سەرۆک کۆمار”، و بانگەوازکردن بۆ خۆپیشاندانەکانی پشتیوانیکردن لە کۆبانی لە ساڵی 2014.
لە کانوونی دووەمی 2024دا، بە 42 ساڵ زیندان سزا درا، بەهۆی دۆسیەی ڕووداوەکانی کۆبانی. لە مانگی تشرینی دووەمی 2025 (بەپێی سەرچاوەکان) دادگای مافەکانی مرۆڤی ئەوروپا (ECHR) بڕیارێکی کۆتایی لە بەرژەوەندی دەمیرتاش دەرکردووە، تانەی وەزارەتی دادی تورکیای ڕەتکردووەتەوە، و جەختی لە پێشێلکردنی مافەکانی کردووەتەوە، فەرمانی ئازادکردنی دەستبەجێی داوە.