ڕاودۆن گلۆڤەر، بەڕێوەبەری جێبەجێکاری کۆمپانیای جاکواری بەریتانیای بەرهەمهێنەری ئۆتۆمبێلی لوکس، بەرگری لە بڕیاری کۆمپانیاکە دەکات بۆ گۆڕینی ڕیشەیی دیزاینەکانی، دوای ئەوەی ئۆتۆمبێلی چەمکی (Concept) نوێیان بەناوی Type 00 ڕەخنەی تێکەڵاوی لێکەوتەوە.
دیزاینی ڕادیکاڵ: Type 00، کە لە مانگی کانوونی یەکەمی ڕابردوو وەک ئۆتۆمبێلێکی کارەبایی دوو دەرگای گەورە (Grand Tourer) نمایش کرا، شێوەیەکی هەیە کە “زۆر جیاوازە” لە ئۆتۆمبێلە وەرزشییە ناسراوەکانی پێشووی جاکوار.
گلۆڤەر بە (ABC News)ی وتووە، “دەمانزانی پێویستە گۆڕانکارییەکی بوێرانە، جووڵەیەکی بوێرانە بکەین.”
ئەو جەخت لەسەر وتە بەناوبانگەکەی سێر ویلیام لایۆنز، دامەزرێنەری کۆمپانیاکە، دەکاتەوە، کەدەڵێت “جاکوار نابێت لاساییکەرەوەی هیچ شتێک بێت.”
گلۆڤەر ئاماژە بەوە دەکات کە دیزاینە گەورەکان پێویستە خەڵک دابەش بکەن، نەک تەنها وەڵامی “ئای چەند جوانە” وەربگرن.
گڵۆڤەر دەڵێت “ئاساییە کە دژبەر بێت. ئێمە بەدوای ئەوەدا ناگەڕێین کە هەمووان بڵێن ‘ئەوە جوانە’. پێموایە دیزاینی گەورە خەڵک دابەش دەکات، جا لە فاشن بێت یان لە ئەندازیاری بیناسازی.”
ئەو داوا لە خەڵک دەکات کە پێش بڕیاردان، ئۆتۆمبێلەکە بە شێوەیەکی فیزیایی ببینن، چونکە بینینی لەسەر مۆبایل ناتوانێت قەبارە و جەوهەری دیزاینەکە بگەیەنێت.
جاکوار هیواخوازە ئەم دیزاینە نوێیانە ببنە هۆی بەرزبوونەوەی فرۆشی براندەکە، بەتایبەتی لە بازاڕی ویلایەتە یەکگرتووەکانی ئەمریکا:
گلۆڤەر پێیوایە ویلایەتە یەکگرتووەکانی ئەمریکا دەبێتە گەورەترین بازاڕیان، وەک ئەوەی لە سەردەمی زێڕینی جاکواردا بوو.
جاکوار دەیەوێت وەک مۆدێلی E-Type لە ساڵانی شەستەکاندا، کە “وەک ئەوەی لە مەریخەوە نیشتبێتەوە” دەچوو، بەرهەمەکانیان جیاواز بن و لە هیچ ئۆتۆمبێلێکی تر لەسەر ڕێگا نەچن.
بڕیارە مۆدێلی نوێی جاکوار لە ساڵی داهاتوو بخرێتە بازاڕەوە، و لەو کاتەدا ڕوون دەبێتەوە کە ئایا ستراتیژی نوێی دیزاینی جاکوار دەبێتە سەرکەوتنێکی بازرگانی یان نا.
چەند وێنەیەکی ئۆتۆمبێلە نوێیەکە:
