گرووپی هاککەری “مادی واتر” لە پشت گەورەترین هێرشی سایبێرییە و زیاتر لە 100 دامەزراوەی حکومی دەکاتە ئامانج.
ڕاپۆرتە ئەمنییە نێودەوڵەتییەکان ئاشکرای دەکەن کە گرووپی هاککەری پەیوەندیدار بە ئێران، ناسراو بە “مادی واتر” (MuddyWater)، زنجیرەیەکی بەرفراوانی هێرشە ئەلیکترۆنییەکانی ئەنجامداوە کە زیاتر لە 100 دامەزراوەی حکومی و دیپلۆماسی لە ڕۆژهەڵاتی ناوەڕاست و باکووری ئەفریقا خستووەتە ژێر مەترسییەوە.
کۆمپانیای ئەمنیی “گرووپ-ئای بی” (Group-IB)، کە هێرشەکەی ئاشکرا کرد، ڕایگەیاند، گرووپەکە کە بە ناوەکانی “مێرکیوری” و “ستاتیک کیتن”یش کار دەکات، هەڵمەتێکی “فیشینگی فێڵبازانە”یان لە مانگی ئابی ڕابردوودا دەستپێکردووە و کەلێنێکی نوێی بە ناوی “فینێکس” بەکارهێناوە.
قوربانییە سەرەکییەکان و دزینی داتا
زۆرینەی قوربانییەکان بریتین لە باڵیۆزخانەکان، وەزارەتەکانی دەرەوە و کونسوڵخانە جیاوازەکان.
هێرشەکە بە بەکارهێنانی بەڵگەنامەی وۆردی زیانبەخش دەستی پێکردووە کە توانای کۆکردنەوەی زانیاریی وردی لەسەر ئامێری قوربانییەکان هەبووە. هەروەها گرووپەکە ئامێرێکی تایبەتی بۆ دزینی داتای نێو وێبگەڕە بەناوبانگەکان (وەک کرۆم، ئۆپێرا و ئێج) بەکارهێناوە.
شارەزایان هۆشداری دەدەن کە ئەم هێرشە تەنها دزینی داتا نەبووە، بەڵکو بووەتە هۆی ڕاگرتنی سێرڤەری چەندین خزمەتگوزاریی حکومی لە ناوچەکەدا، کە زیانێکی بەرچاوی بە ژێرخانی ئەلیکترۆنی گەیاندووە.
سەرچاوە: ماڵپەڕی بڵێپینگ کۆمپیوتەر و کۆمپانیای گرووپ-ئای بی.