دوای چەندجارێك بەرزبوونەوەی لەسەریەكی نرخەكەی بەجۆرێك، كە زێڕنگەران و شارەزایانی بوواری زێڕی تووشی شۆك كردبوو، ئەمڕۆ نرخی كانزا زەردەكە ڕووی لە دابەزین كرد و 254 دۆلاری لە بەهاكەی لەدەستدا.
دانا وەرتی، خاوەنی زێڕنگەری ئازوورا لە هەولێر بۆ (خەڵك) ڕایگەیاند، ئەمڕۆ تا ئێستا نرخی زێڕ بەبڕی 254 دۆلار دابەزیوە بەوەش 4%ی بەهاكەی لەدەستداوە بەجۆرێك نرخی یەك ئۆنسە لە 4 هەزار و 375 دۆلارەوە بۆ 4 هەزار و 121 دۆلار دابەزیوە.
ڕاشیگەیاند، من نازانم ئەمڕۆ بازاڕی ئەمریکا بەرەو کام ئاڕاستە زێڕ دەبات، بەڵام ئەزانین ئێستا جووڵەکە لای ئەوانە چونکە دوو ڕۆژە زێڕ بەیانیان جووڵە خێراکانی نەماوە.
وتیشی، “دەبێت زێر بوەستێت، باڵانسی جووڵە زۆر لاسەنگە ناکرێت هەموو ڕۆژ و هەفتە هەر بەرەو بەرزی بڕوات ئایە تاکەی وادەکات؟ ئەمە ئاسایی نیە و پێشێلکردنی سیفەتی جووڵەی زێرە بەپێی مێژوو”.
ئەو زێڕنگەرە پێیی وایە، “زێڕ دەبێت جارێکی تر بگەڕێتەوە خوار 4000 دۆلار و ئامانجی 4134 بۆ 3947 دۆلار پێویستن ڕووبدات”.
ئەمڕۆ نرخی زێڕ ڕوووی لە دابەزین كردووە بەجۆرێك ئێستا لە بازاڕەكانی هەرێم نرخی مسقاڵێك زێڕی عەیار 24 بە 980 هەزار و عەیاری 21 بە 855 هەزار و عەیاری 18 بە 735 هەزار دینارە و بەوەش نرخی یەك مسقاڵ بەراورد بە دوێنێ 50 هەزار دینار شكاوە.