ن: مامۆستا عبدالواحد
بە بۆنەی ١٠/٥رۆژی جیهانی مامۆستایان و ١٠/٦رۆژی مامۆستایانی هەرێمی كوردستان، پیرۆزباییەكی گەرموگوڕ لە مامۆستایانی جیهان بە گشتی و مامۆستایانی هەرێمی كوردستان بە تایبەتی دەكەین، دەخوازین لەم دوو بۆنەیەدا سڵاو بنێرین بۆ گیانی بەرزە فڕی ئەو مامۆستایانەی ماڵئاواییان لێكردووین ،چ ئەوانەی لە گەرمەی خەباتی پەروەردەیی و نیشتمانی شەهید بوون، چ ئەوانە ئەمری خوای گەورەیان بەجێهێناوە چونەتەوە ماڵی ئەبەدی هەروەها سەریش دابنەوێنین بۆ ئەوانەی خانەنشین بوون و دوای بەخشینی بەهاری تەمەنی خۆیان بۆ نەوە لە دوای نەوەی گەلەكەمان، سڵاو و ئافەرینیش بۆ تەواوی ئەو مامۆستایانە بنێرین كە سەرباری ئەو هەموو كەموكورتیەی لە بوارە جۆراجۆرەكاندا بەریان كەوتوە و دەكەوێت، هێشتا هەر بە ئەمانەتەوە لە گەرمەی بەخشش و قوربانیداندان، بۆ تێگەیاندن و پێگەیاندنی رۆڵە چاوگەش و لاوە خوێنگەرمەكانمان.
جێی وەربیرهێنانەوەیە لە یازدە ساڵی رابردوودا مامۆستایان ئازار و دەردەسەری زۆریان بینی ، بە داخەوە تا ئەم ساتەش هەر بەردەوامە كە هەرگیز نەدەبوو بیبینن، چونكە كاتێك مامۆستا بكەوێتە بەرمەنگەنەی بینە و نیەو كە بایەخ كردنی رۆڵ و پێگەیان هەنوكە و داهاتو و كۆی كومەڵكە دەكەوێتە نێو تەمتومانی پاشەكشێ و بێ سەر و بەری و نادیاری داهاتو، لە خۆڕاییشدا،یابانیەكان نەیانوتوە (((گەر لە دوای مامۆستا رۆیشتی، دەبێت حەوت پێ لێی دوور بیت،نەكا پێ لەسێبەرەكەی بنێی ))) من بە باوەڕی تەواوە دەڵێم ئێستا كاتی ئەوە هاتوە، مامۆستا قەرەبوو بكرێتەوە چیتر بە قسەی لوس و بە دروشمی باق و بریق نەخەڵەتێنرێن، پاساوی جۆارجۆر نەهێنرێتەوە بۆ خۆدزینەوە لە پێدراوە یاساییەكانیان، دەبێت هەمویان بۆ فەرەهەم بكرێت، چ لە بواری كەسایەتیەوە كە مخابن لە ماوەی رابردوودا زۆر روشێنراون لە روی دەرونی و جەستەییەوە هەروەها لە بواری ماددی و مەعنەویەوە، لەوبارەیەوە دەمەوێ ئەو راستیە بە بەرپرسەكان لە گەورەیانەوە تا دوا پلەیان بڵێم هیچ ئەركێك بە زۆر راناپاڕێنرێت مەگەر بە دابینكردنی تەواوی مافەكان نەبێت، بە تایبت پەروەردە و فێركردن.
ئاخر تۆ ماف نەدیت بە چ پێوەرێك داوای جێبەجێكردنی ئەرك دەكەیت، لە كوێی دنیا ئەو ئەو داسەپاندنە هەیە بە تایبەت ئەگەر هیچ پاساوێكی ماقوڵ نەبێت.
بۆیە دەبێت ئەوەی كراوە كە خەریكە پێیەوە سەر لە بەردی ئەلحەد بدرێت ، ئیتر سەروەختی ئەوە هاتوە هەرگیز پێ لە سێبەری مامۆستا نەنرێت، كاتی ئەوە هاتوە بە پەیامبەریان بزانین و لەبەریان بە پێوە دەستە و نەزەر بوەستین، هەمیشەش بە چرایان بزانین لە شەوەزەنگی تاریكی و رۆژە رەشەكانی پەروەردەییمان، بەوە دەگەینە كەناری ئارام و دوارۆژێكی باشتر لەوەی ئێستا تێیداین كە سەرمان پێیەوە گێژی خواردووە و دەخوات، بۆ موچە دەبێت چاوەڕێی موژدە بیت، ئاخۆ كە دەستی كەرەم دەیانگری و كەییش دارای تەفەزول بە راگەیاندنی لیس دەكات، بەوەندەی من بزانم لە هیچ شوێنێكی دنیا ئەو سوكایەتی پێكردنە نیە، بۆ كەسایەتی دەبێت چاوت لە دەستی پەرلەمانێكی بێ كار و كاسبی و سڕكراو بێت، پێشتریش كە كاراش كاتیك داوای ئەوەیان لێكرا شكۆی مامۆستا بپارێزن دووای دوو ساڵ وتیان سەرمان بەوە ژان دەكات واز بێنن، بۆ ژیانێكی باشتریش چاوت لە دەست و مستی (خالتی) تەیف سامی بێت.
بێجگە لە سەر و سەودا سیاسی و بۆڵە بۆڵی زڕداك و زڕبابانەی هەندێ لایەن و بەرپرسی پەروەردەیی كە داوای وەلائو تەوقیع ئەمە و ئەوە دەكەن ئەگەر وەی لە حاڵت كە نابێت بە هیچ شێوەیەك ئەو جۆرە داواكاریانە بكرێت، یان مامۆستایان بخەنە بەر سێرە و هەر رۆژەك بە شتەكی لاوەكی خەیكیان بكەن، تەنها یەك بنەما دەبێت پێوەر بێت ئەویش((( كەسی شیاو بۆ شوێنی شیاو ))) بێت.
دووبارە پیرۆزبایی لە تەواوی مامۆستایانی جیهان و هەرێمی كوردستان دەكەین، لە كارو خەباتدا بەردەوام دەبین، بۆ ئەوەی ئەو لا لێكردنەوەی كە هەتا ئێستا بە نیوەچڵی و خاو و خلیسكیەوە بووە راست بكرێتەوە و پەروەردە بكرێتە ئەولەویەت مامۆستاش بكرێتە سونبول ، دەنا دەبێت ئەمەم بۆ دەسەڵاتدارانە ، ئەو لادانەی پێستا هەیە و بە ئاشكرا دیارە ، پێچ دادەتەوە بەرەو تونێلێكی ئەو دیو تاریك كەسیش بەری پێ ناگیرێت، زەمەن خۆش لە كەس نابوورێت و حیساب و كیتابیش بۆ هەموان كراوە دەبێت هەر بژین بە سەربەرزی كە هەرسەربەرز بوون