کۆشکی سپی هۆشداری دەدات لە “لێکەوتەی وێرانکەر” بۆ ئەمریکا

ئەمڕۆ یەکشەممە، ٥/١٠/٢٠٢٥ ئیدارەی دۆناڵد ترەمپ، سەرۆکی ئەمریکا، هۆشداریدا لە لێکەوتەی ئابووری “وێرانکەر” کە سەرجەم ویلایەتە یەکگرتووەکانی ئەمریکا بگرێتەوە، بەهۆی بەردەوامبوونی داخستنی حکومەتەوە، پاش دواکەوتنی پەسەندکردنی بودجە، بەهۆی ناکۆکییەکانی نێوان هەردوو پارتی کۆماری و دیموکرات.

کۆشکی سپی ڕایگەیاندووە؛ “دیموکراتەکان هۆکاری ئەم قەیرانەن بە بارمتەگرتنی حکومەت لەپێناو تێپەڕاندنی پارەدان بۆ چاودێری تەندروستی بێبەرامبەر بۆ کۆچبەرانی نایاسایی.”

ڕاگەیەندراوەکە ئاماژەی بەوەداوە، کە ئەنجومەنی ڕاوێژکارانی ئابووری هۆشداری دەدات لە ئەگەری لەدەستدانی تا ١٥ ملیار دۆلار لە بەرهەمی ناوخۆیی گشتی (GDP)  هەفتانە لەلایەن ئابووری ئەمریکاوە، لەگەڵ بەردەوامبوونی دۆخی داخستنەکان.

هەروەها ڕاگەیەندراوەکە ئاشکرایکرد؛ شیکارییە ئابوورییە نوێیەکان کاریگەرییە فراوانەکانی قەیرانەکە دەردەخەن، چونکە پێشبینی دەکرێت سەرجەم ویلایەتەکانی ئەمریکا ڕووبەڕووی لەدەستدانی کار، کەمبوونەوەی خەرجکردنی بەکاربەران، لەگەڵ پەککەوتنی پرۆگرامە گرنگەکان ببنەوە کە ملیۆنان هاووڵاتی پشتیان پێ دەبەستن.

کۆشکی سپی ئەم زانیارییانەی بە “تێچووی زۆری ڕێبازی بێباکانەی دیموکراتەکان” وەسفکرد، ئاماژەی بە بوونی داتای ورد کرد کە کاریگەری قەیرانەکە لەسەر ئاستی هەر ویلایەتێک ڕوون دەکاتەوە.

ڕاگەیەندراوەکە ئاماژەی بەوەداوە، بەردەوامبوونی داخستنی حکومەت بۆ ماوەی مانگێک لەوانەیە ببێتە هۆی بەرزبوونەوەی ژمارەی بێکاری بە زیاتر لە ٤٣ هەزار کەس، جگە لە کاریگەرییەکی نەرێنی ئەگەریی لەسەر ژنان و منداڵانی خێزانە هەژارەکان، کە لەوانەیە توانای دەستڕاگەیشتنیان بە خزمەتگوزارییە حکومییە سەرەکییەکان لەدەست بدەن.

کۆشکی سپی ئاماژەی بەوەدا کە لەدەستدانی مووچە بەهۆی وەستانی کارمەندان لە کار، جگە لە کەمکردنەوەی گرێبەستە فیدراڵییەکان، دەبێتە هۆی کەمبوونەوەیەکی بەرچاو لە خەرجکردنی بەکاربەران، کە ئەمەش هەڕەشە لە سەقامگیری ئابووری دەکات لە ماوەی کورتدا.

لە کۆنگرەیەکی ڕۆژنامەوانیدا، کارۆلین لیڤیت، وتەبێژی کۆشکی سپی، ڕایگەیاند؛ دیموکراتەکان بەردەوامن لە “بە بارمتەگرتنی وڵات” بەهۆی سووربوونیان لەسەر پارەدان بۆ چاودێری تەندروستی بێبەرامبەر بۆ کۆچبەرانی نایاسایی، تۆمەتباری کردن بە زیانگەیاندن بە هاووڵاتیانی ئەمریکی لەپێناو خزمەتکردنی ئەو کەسانەی کە بە نایاسایی وەسفی کردن.

جەختی کردەوە کە سەرۆک دۆناڵد ترەمپ، لەگەڵ کۆمارییەکان، هەوڵ دەدەن حکومەت لە زووترین کاتدا دووبارە بکرێتەوە، و داوای کۆتاییهێنانی بەو کارە کرد کە بە “شێتی” وەسفی کرد.