بڕینی بەشە ئارد و خۆراكی ئەو هاووڵاتیانەی لەسیستەمی كارتی ئەلیكترۆنی خۆراك تۆمار نەکراون دەستیپێکرد.
لەدوای کۆتایی هاتنی قۆناغی پڕکردنەوەی زانیاری لە سیستەمی ئەلیکترۆنی خۆراک بڕینی بەشە ئارد و خۆراكی ئەو هاووڵاتیانەی لەسیستەمەکە خۆیان تۆمار نەکردووە دەستی پێ کردووە.
بریكارێكی ئارد لە سلێمانی، كە نەیویست ناوی ئاشكرابكرێت بۆ (خەڵك) ڕایگەیاند، ئەم مانگە لەگەڵ هاتنی بەشە ئارد-ی مانگانەدا، پشكی ئاردی بەشێكی هاووڵاتیان بڕاوە، ئەوەش بەهۆی ئەوەی لە سیستمی ئەلیكترۆنی كارتی خۆراك خۆیان تۆمار نەكردووە.
وەزارەتی بازرگانی عێراق ڕایگەیاندووە، بەشە خۆراکی ئەو هاووڵاتیانەش دەبڕێت کە خۆیان لە سیستمی ئەلیكترۆنی تۆمار نەکردووە.
نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانی و پیشەسازیی هەرێمی کوردستان رایگەیاند: زیاتر لە 700 هەزار هاووڵاتی هەرێمی كوردستان بەهۆی پڕنەكردنەوەی فۆڕمی ئەلیكترۆنی خۆراك بەشە ئاردیان پێ نەدراوە و بەشەخۆراكی تازەشیان لەم مانگەدا پێ نادرێت.
لەبەشە ئاردی حەوتەم، هەشت ملیۆن و 847 هەزار و 750 کیلۆگرام ئارد لەسەر ئاستی هەرێمی كوردستان بڕاوە.
ئاماژەی بەوەش دا: لە بەشی حەوتەمی ئارد لێبڕین و راگرتن لە عێراق و هەرێمی کوردستان دەستی پێکردووە، نزیکەی سێ ملیۆن کەس لە عێراق بەشەئاردی حەوتیان وەرنەگرت و لەم مانگەشدا بەشەخۆراکیش بۆ ئەوانە نایەت کە فۆڕمیان پڕ نەکردووەتەوە.