سیستمی بە ئەلیکترۆنیکردنی پسوڵەی خۆراک لە سێ حاڵەتدا ناوی ئەندامانی خێزان دەکوژێنێتەوە، کە ئەوانیش بریتین لە ئەوەی، هەر کەسێک لە مۆبایلەکەیدا یاریی پەبجی هەبێت، یان جوانکاریی بەڕێژەی 80% کردبێت، یان لە ناوچە سنوورییەکانی نزیک لە ئێران و تورکیا بێت، ناوی ئەندامانی خێزانەکەی لە سیستمەکەدا دەکوژێنێتەوە و بەڕێوەبەری گشتی بازرگانی هەرێم دەڵێت: کاتیان هەیە و دەتوانن چەند رۆژێک وادەکەی درێژ بکەنەوە.
نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانی و پیشەسازی حکومەتی هەرێمی کوردستان ڕایگەیاند، 63% ـی هاونیشتمانییان فۆڕمی ئەلیکترۆنی خۆراکیان پڕکردووەتەوە و دەشتوانن وادەکەی درێژبکەنەوە.
وادەی پڕکردنەوەی پسوڵەی ئەلیکترۆنی خۆراک درێژدەکرێتەوە
نەوزاد شێخ کامیل، ڕاشیگەیاند، وادەی پڕکردنەوەی فۆڕمی ئەلیکترۆنی ڕۆژی 5ـی تەمموز کۆتایی دێت، بەڵام کاتیان هەیە و دەتوانن چەند ڕۆژێک وادەکەی درێژ بکەنەوە، بۆ ئەوەی لانیکەم 85%ـی هاونیشتمانییان فۆڕمی ئەلیکترۆنی پڕبکەنەوە.
وتیشی، “پێویست ناکات هاونیشتمانییان چاوەڕێی کۆتاییهاتنی وادەکە بکەن و دەتوانن لە ماڵەکانیاندا لە ڕێگەی مۆبایلەکانیانەوە فۆڕمەکە پڕبکەنەوە”.
ئاماژەی بەوەشدا، “هەر هاونیشتمانییەک کێشەی پڕکردنەوەی هەیە دەتوانێت سەردانی بەڕێوەبەرایەتییەکانی پسوڵەی خۆراک بکات تاوەکو بۆیان پڕبکەنەوە”.
لە سلێمانی 61% فۆڕمی ئەلیكترۆنیان پڕكردۆتەوە
ئاراس محەمەد، بەڕێوەبەری پسوڵەی خۆراک لە سلێمانی ڕایگەیاندووە، لە سلێمانی یەک ملیۆن و 194 هەزار کەس، کە دەکاتە لە سەدا 61%ـی دانیشتووانی پارێزگاکە فۆڕمی ئەلیکترۆنیی خۆراکیان پڕکردووەتەوە.
وتیشی، “لە بەڕێوەبەرایەتییەکەیان تیمیان هەیە بۆ ئەوانەی کێشەی پڕکردنەوەی فۆڕمی ئەلیکترۆنیان هەیە و بەشێک لە هاونیشتمانییان گواستنەوەیان هەبووە لە بریکارێکەوە بۆ یەکێکی دیکە، خۆمان فۆڕمەکانیان بۆ پڕدەکەینەوە”.
جوانكاری و یاریی پەبجی كێشەیە
ئاراس محەمەد ئاشكرای كرد، ئەوانەی یاری پەبجی لەناو مۆبایلەکانیاندایە، ئەگەر ئەپی فۆڕمی ئەلیکترۆنی خۆراکی تێدا بێت، ئەوا سەرجەم ناوی خێزان و کەسەکان دەکوژێنێتەوە.
وتیشی، “سیستمی بە ئەلیکترۆنیکردنی خۆراک لە ناوچە سنوورەکانی ئێران و تورکیا لۆکەیشنی ئەو وڵاتانە دەخوێنێتەوە و ناوی خێزانەکان دەسڕێتەوە، بۆیە پڕکردنەوەی فۆڕمەکە باشترە لە سەنتەری شارەکان بێت، چونکە ئەوانەی لە نزیک سنوورەکانی ئێران و تورکیان لۆکەیشنی ئەو وڵاتانە دەخوێنێتەوە و سیستمەکە ناوەکان دەیکوژێنێتەوە”.
دەشڵێت: ئەو کەسانەی 80% جوانکاریان کردووە سیستمی بە ئەلیکترۆنیکردنی پسوڵەی خۆراک نایانخوێنێتەوە.