بەڕێوەبەرایەتی پۆلیسی دارستان و ژینگەی پارێزگەی سلێمانی ڕایگەیاند لە ماوەی ٢٤ کاتژمێر ڕابردوودا سەدان دۆنم و ١٥٠٠ داربەڕوو لە سنووری عەربەت، سیتەک و دەربەندیخان سووتان.
ئەمڕۆ چوارشەممە، پۆلیسی دارستان و ژینگەی پارێزگەی سلێمانی ڕایگەیاند، هاتنى وەرزى گەرما و وشکبوونى پووش و پاوان بووەتە هۆی سەرهەڵدانى ڕووداوەکانى ئاگرکەوتنەوە.
ئەوەشی خستەڕوو کە لە سنووری دۆڵی دووکانیان، نزیک کانی گەورەی سەر بە ناحیەی عەربەت ئاگر کەوتەوە و بە هۆیەوە نزیکەی ١٠٠ دۆنم پووش و پاوان سووتا و نزیکەی هەزار داربەڕووش زیانی بەرکەوتووە.
لە سنووری گوندی وەڵانەی سیتەكیش، ئاگرێک کەوتەوە و بەهۆیەوە ٢٠٠ دۆنم پووش و پاوان و داری سروشتی سووتا.
لە سنوورى دەربەندیخانیش ئاگر لە چیای زمناکۆ کەوتەوه و بووە هۆی سووتانی نزیکەی ١٤ دۆنم پووش و پاوان نزیکه ی ٥٠٠ داربەڕوو.
پۆلیسی دارستانی سلێمانی ئەوەشی خستەڕوو کە هۆکاری ئاگرەکن نادیارن و داواشی لە هاووڵاتییان کرد کە لە پێناو پاراستنى سروشت و ژینگەى کوردستاندا پابەندی ڕێنماییەکانی پاراستنی ژینگە بن.
