لە ڕووداوێکی چاوەڕواننەکراودا زیاتر لە ١٨٤ ملیۆن وشەی نهێنی و ئەکاونتی خزمەتگوزاری جۆراوجۆر لە سێرڤەرێکدا دزە پیکرا.
بەپێی ڕاپۆرتێک کە ماڵپەڕی 9to5Mac کە ماڵپەڕێکی تایبەتە بە هەواڵی بەرهەمەکانی ئەپڵ بڵاویکردووەتەوە، جێرمیا فاولەر، توێژەری سەربەخۆی ئاسایش، داتابەیسێکی دۆزییەوە کە لە سەر سێرڤەرێکی ناپارێزراودا هەڵگیراوە و زیاتر لە ١٨٤ ملیۆن وشەی نهێنی و ئەکاونتی خزمەتگوزاری جۆراوجۆری تێدایە، لە خزمەتگوزارییەکانی ئەپڵەوە تا ئەژمێری بانکی و هەندێک پۆرتاڵی حکومی تێدابووە.
بە وتەی فاولەر، داتابەیسەکە لەسەر سێرڤەرێکی کراوە بەجێهێڵراوە و پێویستی بە هیچ پاسۆردێک نەبووە بۆ ئەوەی بتوانێت بچێتە ژوورەوە و بەکاری بهێنێت.
ئاماژەی بەوەشکرد، ئەم داتابەیسە وەک دیارییەکی خەون بوو بۆ هاکەرەکان و تاوانبارانی ئەلیکترۆنی.
داتابەیسەکە زیاتر لە ٤٧ گیگابایت وشەی نهێنی و ئەکاونتی جۆراوجۆری تێدابوو، لەوانە ناونیشانی ئیمەیڵ، ناوی بەکارهێنەر، وشەی نهێنی و بەستەری چوونەژوورەوە بۆ هەر ئەکاونتێک، بەهۆی قەبارەی گەورەی سێرڤەرەکەوە، فاول نەیتوانی هەموو ئەو خزمەتگوزارییانەی کە لە دزەپێکردنەکەدا هاتبوون دەستنیشان بکات.
لە ڕێگەی سکانێکی سادە، فاولەر توانی کۆمەڵێک خزمەتگوزاری دەستنیشان بکات، لەوانە ئەپڵ، ئەمازۆن و دیسکۆرد، هەروەها ئەکاونتەکانی فەیسبووک، گووگڵ، پەیپاڵ، ئێکس، مایکرۆسۆفت و وردپرێس.
فاولەر توانی ڕاستی و دروستی داتا دزەپێکراوەکان پشتڕاست بکاتەوە بە پەیوەندی ڕاستەوخۆی هەندێک لەو ئیمەیڵانەی کە لە دزەپێکردنەکەدا هاتووە، کە ڕاستی داتاکەیان پشتڕاستکردەوە و لە ئێستادا بەکاردەهێنرێت. پاشان فاولەر پەیوەندی بەو خزمەتگوزارییە کرد کە بنکەدراوەی میوانداری کردووە بۆ لابردنی تاوەکو ڕەسەنایەتی خاوەنی بنکەدراوە پشتڕاست بکرێتەوە.
فاولەر پێی وایە ئەم زانیاریانە بە بەکارهێنانی بەرنامەی زیانبەخشی infostealer دزراون، کە جۆرێکی باوی بەرنامەی زیانبەخشە کە لە بەرنامە دزراوەکان و ئیمەیڵە زیانبەخشەکاندا دەبینرێت.