دەستەی حەج و عومرەی عێراق هاووڵاتییان ئاگادار دەکاتەوە کە نەکەونە داوی ساختەکارانەوە و جەختیکردەوە لەوە شتێک بە ناوی “حەجی بازرگانی”یەوە نییە.
ئەمشەو دەستەی باڵای حەج و عومرەی عێراق ڕایگەیاند، لەگەڵ هەموو وەرزێکی حەجدا تێبینی ساختەکاری و فێڵکردن لە هاووڵاتییان دەکەین لە لایەن کۆمپانیا ساختەکان و کەسانێکەوە دەکرێت کە بانگەشەی بوونی حەجی بازرگانی دەکەن.
ئەوەشی خستەڕوو، دەستەکە تاکە لایەنی فەرمی عێراقە پەیوەندی ڕاستەوخۆی لەگەڵ وەزارەتی حەج و عومرەی سعودیەدا هەیە کە ئەویش بەرپرسە لە مۆڵەتپێدانی حەج و ڤیزا بە هاووڵاتییانی عێراق.
جەختیشیکردەوە کە هیچ کەسێک ناتوانێت بە بێ وەرگرتنی مۆڵەت حەج بکات، چونکە پشکی عێراق لە حەجدا دیاریکراوە و تەنیا لە ڕێی تیروپشکی ئەلیکترۆنیشەوە دەدرێتە هاووڵاتییان.
دەستەی حەج هاووڵاتییانی ئاگادارکردەوە، نەکەونە داوی ئەو ساختەکارانەی کە پێدەچێت ئامانجیان دزینی پارەی هاووڵاتییان بێت.