کەشناسی هەرێمی کوردستان پێشبینی دەکات پلەی گەرما بە شێوەیەکی بەرچاو دادەبەزێت و لە ناوچە شاخاوییەکانیش بەفر دەبارێت.
بەڕێوەبەرایەتی گشتی کەشناسی و بوومەلەرزەزانی هەرێمی کوردستان ڕایگەیاند، ئەمڕۆ پێنجشەممە، لە ئەنجامی بەردەوامی کاریگەری نزمە پەستانی ڕۆژهەڵاتی دەریایی سپی ناوەڕاست بۆ سەر ناوچەکەمان ئاسمان هەور و نیمچە هەور دەبێت لەگەل نمە باران لە تەواوی ناوچە سنووریەکانی باکوور و ڕۆژهەڵاتی هەرێم کە لەناوچە بەرزەکان بەفریش دەبارێت.
ڕوونیشیکردەوە کە لە دوای نیوەرۆوە کەشەکە دەگۆڕێت بۆ هەورە تریشقە و بروسکە کە هەردوو سەنتەری شاری سلێمانی و هەلەبجەش دەگریتەوە و ئەگەری توزێکی سووک هەیە زیاتر لەناوچەکانی باشووری ڕۆژئاوای هەرێم و لە کاتەکانی شەودا کەشەکە تا کاتەکانی بەیانی هەینی تاڕادەیەک سەقامگیر دەبێتەوە.
کەشناسی ئەوەشی خستەڕوو کە پلەکانی گەرما نزم بوونەوەیەکی بەرچاو بە نزیکەی 4 – 6 پلەى سیلیزى بەخۆوە دەبینن.
سەبارەت بە سبەینێ هەینیش، کەشناسی هەرێمی وردستان ڕایگەیاند، ئاسمان هەور و نیمچە هەور دەبێت و نمەباران زۆربەی ناوچەکانی بادینان و دهۆک دەگرێتەوە و کەمێک بەفریش لە ناوچە شاخاوییەکان دەبارێت.
لە ڕاگەیەندراوەکەدا هاتووە کە بۆ کاتەکانی نیوەرۆ کاریگەی درێژ دەبێتەوە بۆ ناوچەکانی ڕۆژهەڵات و پارێزگای سلێمانی و ناوچەکانی تری هەرێم.
ڕوونیشیکردەوە کە لە ناوچە شاخاویە سنوورییەکان کەمێک بەفر تا نیوەڕۆی دووەم ڕۆژی نەورۆز بەردەوام دەبێت و پاشان کەشی هەرێم بەتەواوی سەقامگیر دەبێتەوە.
بەرزترین پلەکانی گەرمای پێشبینیکراو بە پلەی سیلیزی
هەولێر :19 پلەی سیلیزی
سلێمانی : 17 پلەی سیلیزی
دهۆک : 15 پلەی سیلیزی
کەرکووک : 21 پلەی سیلیزی
زاخۆ : 15 پلەی سیلیزی
هەڵەبجە : 16 پلەی سیلیزی
سۆران : 15 پلەی سیلیزی
حاجی ئۆمەران : 8 پلەی سیلیزی
گەرمیان :21 پلەی سیلیزی