“بانگەوازی ئۆجالان بۆ ئێمە نییە”

سەرۆکی هێزەکانی حەشدی ئێزیدی ڕەتیکردەوە بەدەم بانگەوازەکەی ئۆجالان بچن و دەڵێت”بانگەوازی ئۆجالان بۆ پەکەکەیە و پەیوەندی بەئێمەوە نییە”.

ئەمڕۆ چوارشەممە 5ـی ئازاری 2025، فەهد حەمەد بەرپرسی هێزەکانی حەشدی ئێزیدی، بەمیدیا عێراقییەکانی ڕاگەیاندووە، بانگەوازەکەی عەبدوڵا ئۆجالان سەرۆکی پارتی کرێکارانی کوردستان بۆ دانانی چەک و هەڵوەشاندنەوەی پەکەکە هیچ پەیوەندییەکی بە هێزە چەکدارە ئێزیدییەکانی شنگالەوە نییە.

حەمەد ئاماژەی بەوەشداوە، هێزە ئێزیدییەکان گروپی ناوخۆیین لە دانیشتوانی قەزای شنگال پێکهاتوون، و هیچ پەیوەندییەکیان بە پارتی کرێکارانی کوردستانەوە نییە”.

جەختیشیکردەوە، بانگەوازەکەی ئۆجالان پەیوەندی بەوانەوە نییە، چونکە ئەوان بەشێکن لە دەسەڵاتی حەشدی ئێزیدی، و ئەرکی تایبەت ئەنجامدەدەن کە پەیوەستە بە پاراستنی ئاسایشی شنگال و ناوچەکانی دەوروبەری، و ڕێگریکردن لە دزەکردنی داعش.

ئاماژەی بەوەشکرد، هێزەکانی حەشدی ئێزیدی بەشێکی سەرەکین لە هێزەکانی حەشدی شەعبی، و لەڕووی دارایی و سەربازی و ئیدارییەوە پەیوەستن پێکەوە، و ڕەتیدەکاتەوە هیچ پەیوەندییەک بە پارتی کرێکارانی کوردستانەوە هەبێت.

جێگای سەرنجە، عەبدوڵڵا ئۆجالان، ڕێبەری پارتی کرێکارانی کوردستان، کە لە تورکیە زیندانی کراوە، لەم دواییانەدا داوای لە گروپەکەی کرد چەک دابنێن و پارتەکە خۆی هەڵبوەشێنێتەوە.