وەزارەتی ناوخۆ رەتیدەکاتەوە

دەنگۆیەک بڵاوبووەتەوە، گوایە لە سەرەتای مانگی داهاتووەوە دەرهێنانی مۆڵەتی شۆفێری لە هەرێمی کوردستان گۆڕانکاری تێدا دەکرێت، بەڵام وەزارەتی ناوخۆ رەتیدەکاتەوە.

چەند رۆژێکە لە تۆڕە کۆمەڵایەتییەکان و بەشێکی میدیاکان دەنگۆیەک بڵاوکراوەتەوە، گوایە لە 01ـی مانگی داهاتووەوە ژمارەیەک گۆڕانکاری لە دەرهێنانی مۆڵەتی شۆفێریدا دەکرێت؛ دیارترینیان وانە خوێندنە بۆ ماوەی 21 ڕۆژ و شۆفێریکردنە بۆ ماوەی 12 ڕۆژ و زیاترکردنی ڕسوماتەکانە.

هیچ بنەمایەکی نییە

ئەمڕۆ هەینی 17-01-2025، سەرچاوەیەکی باڵا لە وەزارەتی ناوخۆی هەرێمی کوردستان بۆ (ڕووداو) ڕایگەیاندووە، “دەنگۆی گۆڕانکاری لە پێدانی مۆڵەتی شۆفێری ڕەتدەکەینەوە و هیچ بنەمایەکی نییە و دوورە لە راستییەوە”.

وتوشیەتی، هەموو کەسێک مافی دەرهێنانی مۆڵەتی شۆفێری هەیە بەو مەرجەی بۆ مۆڵەتی شۆفێری جۆری تایبەت تەمەنی 18 ساڵی تێپەڕاندبێت و بۆ مۆڵەتی گشتیش تەمەنی 20 ساڵ زیاتر بێت؛ هەروەها مەرجە تەندروستییەکانی تێدا بێت و خاوەن ڕەگەزنامەی عێراق بێت.