ئێمە لە تۆرە کۆمەڵایەتیەکان

کوردستان

سەرۆكی فراكسیۆنی پارتی ڕونكردنەوەیەكی لەسەر ئەم وێنەیە بڵاوكردەوە


خەڵك- بەشی هەواڵ

بڵاوبوونەوەی وێنەی خوانێك بۆ ژمارەیەك پەرلەمانتاری پارتی لە سلێمانی بووەتە باسی تۆڕە كۆمەڵایەتییەكان و سەرۆكی فراكسیۆنەكەش ڕونكردنەوەیەكی لەوبارەوە بڵاوكردەوە.

ئومێد خۆشناو لە ڕونكردنەوەكەدا نوسیویەتی” شەوی رابردوو بەخۆشحاڵیەوە لە شاری سلێمانی حاجی هەڵكەوت لالە ئەنوەر كەسایەتی خانەدان و كۆمەڵایەتی شارەزوور خوانێكی سازكرد بۆ فراكسیۆنی پارتی و ئەركێكی زۆرو زەحمەتیان كێشابوو، سوپاس بۆ میوانداری و خانەدانییان.”

هەروەها نوسیویەتی”كۆمەڵێك پەیج و ئەكاونت و ماڵپەڕی ناسراوی موخابەراتی ، وێنەیەكی ئەم خوانەیان دەست كەوتووەو وەك بڵێی هەنگوینیان لەناو دار دۆزیوەتەوە، بێ ئەوەی بێر لەوە بكەن كە لە كوردستاندا سەدان خانەوادە هەن بە نان دان و خانەدانی و بەناوبانگی سفرەكانییان ناسراون.”

لە بەشێكی دیكەدا وتویەتی” ئێمە هەفتەیەكە لە سلێمانین و بەردەوام دەبین لە چالاكی و جموجوڵی خۆمان كە خەڵكێك پێی عەزیەت بوون و لە سلێمانییەوە تا كەلار بێ وەستان كارمان كردووە، دڵنیایان دەكەینەوە سلێمانی و گەرمیان و ڕاپەڕین موڵكی باوكی كەس نیەو ئێمه كوڕی ڕێ و ڕێبازێكین ناوەستین و لەخزمەت خەڵك و خاك و ڕێ و ڕێبازی خۆمانین و بەردەوام دەبین….”

ئابوری

ئەمڕۆ وەزارەتی خوێندنی باڵا مووچە وەردەگرێت


خەڵك-بەشی هەواڵ

بەپێی ئەو خشتەیەی پێشتر وەزارەتی دارایی بڵاویكردەوە، بڕیارە ئەمڕۆ یەك شەممە 5-4-2020 مووچەی مانگی 12ی ساڵی ڕابردووی وەزارەتی خوێندنی باڵای حكومەتی هەرێمی كوردستان دابەش بكرێت.

بەپێی زانیارییەكانیش دابەشكردنی مووچە لە ڕۆژانی داهاتوو بەردەوام دەبێت، ئەمەش لەكاتێكدایە مووچەی سێ مانگی ئەمساڵ هیچ وادەیەك دیاری نەكراوە بۆ دابەشكردنی.

بەرپرسانی حكومەتی هەرێم ڕایدەگەیەنن، بەهۆی بڵاوبوونەوەی ڤایرۆسی كۆرۆنا و داخستنی سەرجەم چالاكییە ئابوورییەكان، داهاتی حكومەتی هەرێم لە سفر نزیك بووەتەوە، بەو هۆیەشەوە دابەشكردنی مووچەی لەكاتی خۆیدا دابەش ناكرێت.

بەردەوام بە لە خوێندنەوە

کوردستان

وەزارەتی تەندروستی: 18 كەسی دیكە لە هەولێر تووشی كۆرۆنا بوون


خەڵك – بەشی هەواڵ
ئەمڕۆ یەك شەممە وەزارەتی تەندروستی هەرێمی كوردستان تووشبوونی 18 كەسی دیكەی بە ڤایرۆسی كۆرۆنا ڕاگەیاند.

لە ڕاگەیەندراوەكەی وەزارەتی تەندروستیدا هاتووە لە بەردەوامی پشکنینەکان و گەڕان بەدوای گومانلێکراوان، 18 تووشبووی ڤایرۆسی کۆرۆنای نوێ COVID-19 لە شاری ھەولێر دەستنیشانکران.

ڕوونیشیكردەوە کە تووشبووەكان 8 پیاو و 6 ئافرەت و 4 منداڵن و سەرجەمیان بەرکەوتەی تووشبوویەکی پرسەی ماتەمینی گەڕەکی کارێزانن و دانیشتووی چەند گەڕەکێکی جیاوازی شاری هەولێرن.

بەوەش کۆی گشتی تووشبووانی پرسەی ماتەمینیەکەی گەڕەکی کارێزان بووە 32 كەس.

بەردەوام بە لە خوێندنەوە

کوردستان

بەهۆی سەرپێچی هاتوچۆوە، زیاتر لە سێ هەزار ماتۆڕسكیل دەستی بەسەردا دەگیرێت


خەڵك-بەشی هەواڵ

ئەفسەری دەستبەسەرداگرتن لە بەشی یاسایی بەڕێوەبەرایەتی هاتوچۆی هەولێر ڕایدەگەیەنێت، دەستیان بەسەر نزیكەی سێ هەزار و سێ سەد و سی ماتۆڕسكیلدا گرتووە.

ئیبراهیم موخڵیس ئەفسەری دەستبەسەرداگرتن لە بەشی یاسایی بەڕێوەبەرایەتی هاتوچۆی هەولێر لە لێدوانێكی ڕۆژنامەوانیدا ڕایگەیاند، بەهۆكاری جیاواز، دەستمان بەسەردا سێ هەزار و سێ سەد و سی ماتۆڕسكیلدا گرتووە، هەندێكیان هیچ تابلۆ و ئەوەلیاتی نییە یاخود مۆڵەتی تایبەت بە ماتۆسیكلیان نییە یان كەمتەرخەم بوون لە دابینكردنی پێداویستیەكانی سەلامەتیی و ئەمەش پێچەوانەی یاساكانی هاتوچۆیە و دەستییان بەسەردا دەگیرێت.

وتیشی”ئەو ماتۆڕسكیلانەی ساڵنامەیان نەبێت هیچ مامەڵەیەكیان بۆ ناكرێت و ماتۆڕسیكلەكەیان دەستی بەسەردا دەگیرێت و نادرێتەوە بە خاوەنەكانییان، ئەوانەی دیكەش پێویستە هەموو بەڵگەنامەكانییان بهێنن و دوای ڕێكارە یاساییەكان دەتوانن ماتۆڕسیكلەكانییان ببەنەوە و بەڵێنامەی لێوەردەگیرێت و لە حاڵەتی سێیەم جاردا، ماتۆڕسیكلەكە دەستی بەسەردا دەگیرێت و نادرێتەوە بە خاوەنەكەی”.

ئاشكراشیكرد، لەمیانی ڕاگەیاندنی قەدەغەی هاتوچۆ، تیمەكانی هاتوچۆ بەردەوامن لە لێپێچینەوە لە هەموو ئەو ماتۆڕسیكل و ئۆتۆمبێلانەی سەرپێچی ئەنجام دەدەن و سزایان دەدەن.

بەردەوام بە لە خوێندنەوە

کوردستان