ئێمە لە تۆرە کۆمەڵایەتیەکان

وتار

بەڕێز سەرۆكی حكومەت ١٠٠ پڕۆژە تەواو نەكراوەكەی پارێزگای ھەڵەبجەت لەیادە؟؟

سەركۆ ئازاد گەڵاڵی

لەدوای ڕاپەرین و كۆڕەو و ئازادكردنی كوردستان و ڕوخانی ڕژێمی سەدامی گۆڕبەگۆڕەوە یەكێك لەناوچە مەنكوب و بێ خزمەتگوزارییەكان لەئاستی عیراق و ھەرێمی كوردستان ھەڵەبجەیە، بەتایبەت دوای ئەوەی حكومەتی ھەرێمی كوردستان بڕیاری بەپارێزگابوونی بۆدەركرد لە ڕێكەوتی ١٣/٣/٢٠١٤ و دواتر فەرمانی ھەرێمی لە ١٦/٣/٢٠١٤ بۆ پارێزگای ھەڵەبجە دەرچوو، لەو كاتەوە كار بۆسەرپێخستنی ئەو پارێزگایە دەكرێت بۆیە وەك ھاووڵاتییەكی ھەڵەبجە نامانەوێت تەنھا وەك قوربانییەك و برینێكی بێكۆتا حكومەت و سیستمی سیاسی ئەم ھەرێمە ئێمەی لەیاد بێت و لێمان بڕوانێیت بەڵكو وەك شارێك ئاوڕمان لێبداتەوە نەك بە شێوازی قەزایەك مامەڵەمان لەگەڵدا بكرێت چونكە ھەڵەبجە پێش سەدە و نیوێك قەزابووە كە دەكاتە ساڵی ١٨٨٩.

ھاووڵاتیانی ئەم شارە بریندارە ئاواتەخوازبوون ئەم بڕیار و فەرمانانە بەشێك لەبرینی جەستەیان ساڕێژ بێت، بەڵام تا ئێستا لەلایەن حكومەتی یەكگرتووی ھەرێمی كوردستانەوە وەك قەزایەك مامەڵەی لەگەڵ دەكرێت لەدوای دەستبەكاربوونی كابینەی نوێی حكومەتی ھەرێمی كوردستان دوای ٧ مانگ سەرۆكی حكومەت بڕی ٥٠٠ ملیۆن دیناری بۆ ئەو پارێزگایە كە قەزایەك و چوار ناحیەیە تەرخانكرد بۆ ساڵێك بەڵام تائێستا خەرج نەكراوە لە كاتێكدا بڕی 18 ملیار دینار بۆتەواوكردنی تونێلی سەڵاحەدین تەرخانكراوە ئەمە جیاوازی گەیاندنی خزمەتگوزاری ناوچەیی نەبێت چیتر ھەڵدەگرێیت بەڕێز سەرۆكی حكومەت !!

چەندین ساڵە خەڵكی ئەم شارە داوای دروستكردنی پردەكانی تەنگی سەید محەمەد و بەتایبەت دروستكردنی (پردی تووەقوت) كە پارێزگای ھەڵەبجە دەبەستێتەوە بە ھەردوو قەزای دەربەندیخان و شارەزوور، و بەمەش ھاتوچۆ و ئاڵوگۆڕیی بازرگانی لە نێوان ھەڵەبجە و ئیدارەی گەرمیان ئاسان دەكات، كە ڕەزامەندی بۆدابینكردنی بودجەی پێویست بەبڕی ٨ ملیار و ٤٥٠ ملیۆن دینار بۆ دەرچووە، بەڵام تا ئێستا لەسەر كاغەزە، بەڵام بۆ شاری خۆشەویستی دھۆك زیاتر لە 34 ملیار دینار ئەندەرپاس لە بەرانبەر مزگەوتی شەهیدان بە درێژایی 1كم و شەش سەد مەتر لەم وەرزی سەرما و سۆڵە جێبەجێ دەكرێت ئەم نادادی كارگێڕی و نایەكسانی نەبێت چیە بەڕێز سەرۆكی حكومەت؟ .

ئایا دەزانیت بەھۆی قەیرانی داراییەوە زیاتر لە ١٠٠ پڕۆژەی ئەو شارە ڕاگیراوە تائێستا دەست نەكراوەتەوە بەگەڕخستنەوەی ئەی ئەم مامەڵەیە چی ناودەنرێت!!!

ئایا دەزانیت تا ئێستا حكومەت ئاڕاستەی كاركردنی ڕوو لە وەبەرھێنان و پڕۆژەی نیشتەجێبون نیە لەم شارە بۆ دەرخستنی ئەم ڕاستییە تائێستا بەڕێوەبەرایەتی گشتی وەبەرھێنان لێرە بوونی نییە.

تەنھا ھەشت بەڕێوەبەرایەتی گشتی لەم شارە ھەیە ھەر ھەموویان بەوەكالەت دەبرێت بەڕێوە ئایا ئەمە سیاسەتی تەھمیش نییە لە لایەن ھەولێرەوە پەیڕەو دەكرێت!!!!

ھەموومان دەزانین جگە لە كیمیاباران ھاووڵاتیانی ھەڵەبجە ئەنفال كراون و زیندانی كراوان لە نوگرەسەلمان تائێستا بەڕێوەبەرایەتی گشتی زیندانیانیان نییە!!

زیاد لە ھەزار ھاووڵاتی ھەڵەبجە پێناسی مووچە و مینحەی بۆ كراوە لە ساڵی ٢٠١٣ پێناسەكانیان وەرگرتووەتەوە، بەڵام تا ئێستا یەك مینحە و مووچەیان وەرنەگرتووە خۆ نە شەڕی داعش ماوە نە قەیرانی دارایی، بەڵام بۆ كاری پێ ناكرێت ئەمە ڕێزگرتنە لە قوربانیانی ئەم شارە !!!!

لەساڵی ٢٠١٨ ھاووڵاتیانی زیندانی نوگرەسەلمان و ئەنفالكراوانی ھەڵەبجە فەرمانی وەرگرتنی زەویان بۆ دەرچووە، بەڵام وەزارەتی شارەوانی ڕایگرتووە تاكەی ئەم چەوساندنەوە و چاوەڕوانییە خەڵكی ئەم شارە ھەڵناگرن كە سەرچاوەكەی پایتەختە!!!

بە بڕیاری ژمارە ٢٣ پەرلەمانی كوردستان ئەم شارە بە پایتەختی ئاشتی ھەرێمی كوردستانە لە بڕگەی دووەمی بڕیارەكەدا ھاتووە كە دەبێت حكومەت بودجەیەكی ساڵانە بۆ ئەم مەبەستە دیاری بكات وەك ٢٠ ملیارە دینارەكەی بۆ پایتەختی ڕۆشنبیری خەرجكراوە لە سلێمانی و ٥ ملیار بۆ پایتەختی گەشتیاری ھەولێر خەرجكراوە، بەڵام نەك پارەكە دیار نییە بەڵكو كۆنفڕانس و كۆڕ و سیمینار و مەڕاسیمی تایبەت بە بڵاوكردنەوەی ڕۆشنبیری و پەیامی پێكەوەژیان لەم شارە ساز ناكرێت !!!

نامەوێیت لێرە باسی كتێبخانە گشتی و پارك و مۆزەخانە و ھتد كە پێويستن لە شار ھەبن، بەڵام لێرە نین.

وا دیسان وەزارەتی شەھیدان ئامادەسازی دەكات بۆ یادكردنەوی كارەساتی ھەڵەبجە، بەڵام لە یاریگایەك نەك ھۆڵێكی بۆنەی شایستە بەم شارە.

حكومەتی ھەولێر لە ڕۆژژمێری خۆیدا تەنھا جارێك ناوی دەبات ئەویش بۆ یادكردنەوە و كولاندنەوەوی برینەكەی نەك بە پڕۆژە و پلانی ستراتیجی !! ئایا دەزانن خەڵكی ئەم شارە گوێكانی سیخناخ بووە بە بەڵێن لە كاتێكدا تا ئێستا كەیسی مناڵانی ونبووی ھەڵەبجە بە كراویی ماوەتەوە ھەموو ڕۆژێكی ساڵ چاوەڕێی ھاتنەوەی جگەرگۆشەكانیان.

نازانم باسی كام خەمی ھەڵەبجە بكەم

پرسیاری ئەوە بكەین وەك خەڵكی ھەڵەبجە لە دانیشتنەكانتان لە گەڵ بەغداد چ كەیسێكی ھەڵەبجەتان لە بەردەست بوو بۆ گفتوگۆگردن ؟؟ داكۆكیتان لە ناساندنی نۆزدەھەمین شاری عیراق كرد یان جێكردنەوەی لە بودجەی ساڵی٢٠٢٠ یان نەخشەی كۆتایی ئەم شارەتان ڕادەست كرد ؟؟

ئەو شارەی زیاتر لە ١١٠ سەد و دە كیلۆمەتر سنووری بە كۆماری ئیسلامی ئێرانەوە ھەیە، بەڵام تا ئێستا ڕێكارە یاسایی و كارگێڕیەكانی ھەر دوو مەرزی پشتە و شوشمێ لەسنوری نێودەوڵەتی تەواو نەبوون لەلایەن عیراقەوە، بەڵام لەلایەن كۆماری ئیسلامی ئێرانەوە ھیچ كێشەیەكیان نەماوە ئایا كارتان لە سەر ئەم كەیسە كرد لە گفتوگۆكانتان لەگەڵ بەغداد كە ھەمووان دەزانن دوایی تەواوبوونی چ سوودێكی ئابووری دەگەیەنێت بەم شارە ؟

یان باسی ئەو نادادپەروەرییەی كە لە سەدا ٪‏٢ پەرەپێدانی پارێزگاكان بۆ ئەم شارە دانراوە !!
بۆیە وەك ھاووڵاتییەكی سادە و نوێنەری ئەو شارە داواكارین ڕوونكردنەوەمان بدەنێ لە سەر پەراوێزخستن و نەگەیاندنی خزمەتگوزاری گشتی و مامەڵەنەكردنی وەك شار لە ئەرزی واقیعدا نەك تەنھا لەسەر كاغەز و دروشم .

وتار

توانای عێراق بۆ بەرەنگاربونەوەی ( کۆرۆنا) ڤایرۆسی سەردەم

ئاشنا هەڤاڵ

ئەم قەیرانە قوڵە ودرێژخایەنەی کە عێراق ساڵانێکە بە ئێستاشەوە پێیدا تێپەڕیوە هەموو کەرتەکانی پێشکەوتنی ژیانی بەرەو لاوازی بگرە پاشکەوتن بردووە لە نێوانیشیاندا کەرتی تەندروستی،
و ئەگەر وەڵامی پرسیاری ئەوە بدەینەوە کە ئایا عێراق لە نیشاندەری تەندروستی نێودەوڵەتیدا چ پێگەیەکی هەیە
لەرێی ئەو نیشاندەری تەندروستی نێودەوڵەتیە کە ئەنجامدراوە بۆ بەرەنگاربونەوەی ڤایرۆس ۱۹٥ وڵاتی تیابوو لەنێوانیشیاندا عێراق
تیایدا عێراق بە پلەی ۱٦۷ هات لەسەر ئاستی نێودەوڵەتی و بەپلەی ۱۳ هات لەسەر ئاستی وڵاتانی عەرەبی.
بەپێی ئەم نیشاندەرە عێراق بەپلەی ۱٦۷ کە دەکاتە پلەی ۲٥.۸ بەپێی نیشاندەری تەندروستی نێودەوڵەتی لە کاتێکدا ئاستی مامناوەند لە نیشاندەری GHS بریتیە لە ٤۰.۲ لەتێکرای ۱۰۰
هەڵبەتە ئەمەش دەرخەری ئەوەیە کە عێراق بەدەست لاوازی دەناڵێنێ لەبەرەنگاربونەوە و دۆزینەوەی نەخۆشی
کە نیشاندەری ئەوەیە کە عێراق توانای کەمە بۆ بەرەنگاربونەوەی هەر نەخۆشیەکی کتوپڕ
و ئەگەر عێراقیش پۆڵێن بکەین لەنێوان وڵاتانی عەرەبی بەپێی نیشاندەری تەندروستی نێودەوڵەتی ئەوا:
۱- سعودیە ( ٤۷ لەسەر ئاستی نێودەوڵەتی بەپلەی ٤۹.۳) دێت
۲- ئیمارات ( ٥٦ لەسەر ئاستی نێودەوڵەتی بەپلەی ٤٦.۷) دێت
۳- کوەیت (٥۹ لەسەر ئاستی نێودەوڵەتی بە پلەی ٤٦.۱) دێت
٤- مەغریب (٦۸ لەسەر ئاستی نێودەوڵەتی بەپلەی ٤۳.۷) دێت
٥- لوبنان ( ۷۳ لەسەر ئاستی نێودەوڵەتی بەپلەی ٤۳.۱) دێت
٦- سەڵتەنەی عەمان ( ۷۳ لەسەر ئاستی نیودەوڵەتی بەپلەی ٤۳.۱) دێت
۷- قەتەر (۸۲ لەسەر ئاستی نێودەوڵەتی بەپلەی ٤۱.۲) دێت
۸- میسر (۸۷ لەسەر ئاستی نێودەوڵەتی بە پلەی ۳۹.۹) دێت
۹- بەحرەین (۸۸ لەسەر ئاستی نیودەوڵەتی بەپلەی ۳۹.٤) دێت
۱۰- تونس لەسەر ئاستی نێودەوڵەتی بەپلەی ۳۳.۷) دێت
۱۱- مۆریتانیا ( ۱٥۷ لەسەر ئاستی نێودەوڵەتی بەپلەی ۲۷.٥) دێت
۱۲- جزر قەمەر ( ۱٦۰ لەسەر ئاستی نێودەوڵەتی بەپلەی ۲۷.۲) دێت
۱۳- سودان (۱٦۳ لەسەر ئاستی نێودەوڵەتی بەپلەی ۲٦.۲) دێت
۱٤-عێراق ( ۱٦۷ لەسەر ئاستی نێودەوڵەتی بەپلەی ۲٥.۸) دێت
۱٥- لیبیا ( ۱٦۸ لەسەر ئاستی نێودەوڵەتی ب پلەی ۲٥.۷) دێت
۱٥- جەزائیر (۱۷۳ لەسەر ئاستی نێودەوڵەتی بەپلەی ۲۳.٦) دێت
۱٦- جیبۆتی ( ۱۷٥ لەسەر ئاستی نێودەوڵەتی بەپلەی ۲۳.۲)دێت
۱۷- سوریا (۱۸۸ لەسەر ئاستی نێودەوڵەتی بەپلەی ۱۹.۹) دێت
۱۸- یەمەن (۱۹۰ لەسەر ئاستی نێودەوڵەتی بەپلەی ۱۸.٥) دێت
۱۹- سۆماڵ ( ۱۹٤ لەسەر ئاستی نێودەوڵەتی بەپلەی ۱٦.٦) دێت

و ئەو دە وڵاتەی کە دە پلەی یەکەم تۆماردەکەن لە نیشاندەری تەندروستی نێودەوڵەتی بریتین لە :

۱- وڵاتە یەکگرتوەکانی ئەمریکا : بە پلەی ۸۳.٥ دێت
۲- بەریتانیا : بەپلەی ۷۷.۹ دێت
۳- هۆڵەندا بەپلەی ۷٥.٦ دێت
٤- ئوسترالیا : بەپلەی ۷٥.٥ دێت
٥- کەنەدا: بەپلەی ۷٥.۳ دێت
٦- تایلاند: بەپلەی ۷۳.۲ دێت
۷- سوید : بە پلەی ۷۲.۱ دێت
۸- دەنیمارک : بەپلەی ۷۰.٤ دێت
۹- کۆریای باشور: بەپلەی ۷۰.۲ دێت
۱۰- فنلەندا : بەپلەی ٦۸.۷ دێت

لەکۆتاییدا بەڕاچاوکردنی ئەوەی عێراق ئەم پلەی تۆمارکردووە پێویستە عێراق هەوڵبدا لەم کەرتە پێش بکەوێت بۆ ئەوەی بتوانێ بەلایەنی کەم بەرەنگاربی ئەو نەخۆشیە کت و پڕ و لەناکاوانە بێت کەتوشی هاوڵاتیان دەبێتەوە بەمەش پێشکەوتن و گرنگی دان و وەبەرهێنان کردنی بەردەوام لەکەرتی تەندروستی زۆر گرنگە بۆ ڕێگرتن لەونەخۆش و ڤایرۆسانەی کە ئەگەری ئەوەیان هەیە ببنە پەتا لەناو خەڵک.

*مامۆستا و توێژەری ئابووری

بەردەوام بە لە خوێندنەوە

وتار

کۆرۆنا ڤایرۆس، جیهان له‌ خاڵی وه‌رچه‌رخان نزیك ده‌كاته‌وه‌ !

لوقمان غەفوور

 

له‌ئاكامی بڵاوبوونه‌وه‌ی ڤایرۆسی كۆرۆنا، جیهان به‌خێرایی نزیك ئه‌بێته‌وه‌ له‌خاڵی وه‌رچه‌رخان، و پسپۆرانیش ئاگاداری ده‌ده‌ن كه‌ نه‌خۆشییه‌كه‌ سه‌ركه‌وتووه‌ به‌سه‌ر توانا به‌كارهاتووه‌كانی مرۆڤ، بۆ كۆنترۆڵكردنی نه‌خۆشییه‌ قورسه‌كان، ئه‌وه‌ش دوای ئه‌وه‌ی كه‌ كۆریای باشور باری نائاسایی راگه‌یاند و له‌ئه‌وروپاش، ئیتالیا و له‌ ئاسیاش، ئیران، دۆخێكی سه‌خت رووی تێكردوون.

دوای دڵنیابوون له‌ 79 هه‌زار و 365 كه‌یسی كۆرۆنا ڤایرۆس COVID-19 له‌ جیهاندا، پسپۆران جه‌خت له‌وه‌ ده‌كه‌نه‌وه‌ كه‌ نه‌خۆشییه‌كه‌ چۆته‌ حاڵه‌تی مۆڵه‌قه‌وه‌. چونكه‌ بڵاوبوونه‌وه‌ له‌ ئه‌وروپا، كه‌وتنی ژیانی سه‌ر رووی زه‌وییه‌. ئێستا 11 شاری باكوری ئیتالیا كه‌ 50 هه‌زار كه‌س تێیدا نیشته‌جێیه‌ دوو رۆژه‌ قه‌تیس ماون و ژیانیان به‌رووی شاره‌كانی تری ئیتالیا و ئه‌وروپا وه‌ستاوه‌. به‌شێوه‌یه‌ك پۆلیس هه‌ر كه‌سێك شاره‌كه‌ی به‌جێبهێڵێت، ده‌ستگیرده‌كات، و غرامه‌ی ماددی ده‌كرێت. له‌ئاسیا ئێران 14 شار و شارۆچكه‌ خوێندنگه‌ و زانكۆكانی داخستووه‌.

وۆردد پۆل هانتێر مامۆستای پزیشكی له‌ كۆلێژی ئێست ئه‌نگلیا له‌ به‌ریتانیا، تیدرۆس گبرێسیس به‌رێوه‌به‌ری گشتی WHO ئاگادارده‌كاته‌وه‌ كه‌ ئیتر كاتی ئه‌وه‌نده‌ لێدوانی بێئه‌نجام نییه‌و كاتی كۆنترۆڵكردنی ده‌رده‌كه‌یه‌ به‌ر له‌وه‌ی دنیا وێران بكات. هانتێر كه‌مكردنه‌وه‌ی رێژه‌ی تووشبوون له‌ چین و زیادبوونی له‌ ئه‌وروپا به‌ده‌ستكه‌وت نازانێت بۆ رێكخراوه‌كه‌. زیادبوونی ژماره‌ی تووشبوون له‌ ئه‌وروپا نائارامییه‌كی گه‌وره‌ی دروستكردووه‌. ده‌رباره‌ی ئێران-یش زانایان پێیانوایه‌ ئه‌بێته‌ سه‌رچاوه‌ی نه‌هامه‌تی بۆ خۆرهه‌ڵاتی ناوه‌ڕاست دوای ئه‌وه‌ی 23ی فێبریوه‌ری به‌ره‌سمی پاكستان و توركیا هه‌موو سنووره‌كانیان له‌گه‌ڵ ئێران داخست. ئه‌مه‌ جگه‌ له‌وه‌ی ناوچه‌یه‌كه‌ ململانێی چه‌كداری تیایه‌.

دكتۆر رۆبن تۆمسۆن توێژه‌ری ئیپێدیمیالۆژی له‌ زانكۆی ئۆكسفۆرد، به‌ نیگه‌رانییه‌وه‌ باسی ئیتالیا ده‌كات و ده‌ڵێت: “پێویسته‌ هه‌موو ئه‌وروپا بیر بكه‌نه‌وه‌”، ئه‌م بیركردنه‌وه‌ی تۆمسۆن له‌وه‌وه‌ سه‌رچاوه‌ی گرتووه‌ كه‌ ئۆردن هه‌موو هاتوچۆیه‌كی ئاسمانی له‌گه‌ڵ ئێران و چین و كۆریای باشور داخست. كه‌ دوور نییه‌ بڕیار بدرێت به‌داخستنی گه‌شتی ئاسمانی تێكڕای وڵاتان له‌گه‌ڵ ئیتالیا، به‌ڵام ئه‌ی چی له‌و سه‌دان مایل میترۆیه‌ی نێوان ئیتالیا و سه‌رجه‌م ئه‌وروپا ئه‌كه‌یت!.

لێدوانه‌كه‌ی 23ی فێبریوه‌ری، شی جین بینگ –ی سه‌رۆكی چین هیچی تیا نه‌هێشته‌وه‌ كاتێك وتی:”هێشتا ژیان له‌ چین تاریك و تنوك و پڕ گرێوگۆڵه‌” سه‌ره‌ڕای ئه‌وه‌ی جه‌ختی له‌وه‌كرده‌وه‌ كه‌ به‌ره‌نگاربوونه‌وه‌ی به‌رده‌وامه‌، به‌ڵام نه‌یشارده‌وه‌ كه‌ به‌ره‌و وه‌رزی كشتوكاڵ ده‌ڕۆن و ئه‌بێته‌ په‌كخستنی كه‌رتی كشتۆكاڵی وڵاته‌كه‌ی.

كۆتا ئه‌وه‌یه‌، دوا پێشهاته‌كان بۆ كۆریای باشور و ئێران و ئیتالیا سه‌خته‌، چونكه‌ ته‌نیا له‌ 24 سه‌عاتدا له‌ كۆریای باشور له‌ 602 كه‌یسه‌وه‌ سه‌ركه‌وتووه‌ بۆ 763 كه‌یس و مردنیش بوو به‌ 7 كه‌س، له‌ ئێرانیش دوو كه‌سی تر مرد به‌مه‌ ئێران بووه‌ به‌ 8 كه‌س كه‌ گیانیان له‌ده‌ستداو 43 كه‌سیش تووشبوون.

بەردەوام بە لە خوێندنەوە

وتار

بەرەوپێشبردنی پارێزگای هەڵەبجە

بەیار عومەر 

پارێزگای هەڵەبجە نازی بەسەر هەموو تاکێکی کوردەوە هەیە، کیمیابارانی هەڵەبجە خاڵی وەرچەرخان بوو لە مێژووی کوردا و دۆزی کوردی بە دنیا ناساند، بەڵام لە ڕوی خزمەتگوزاری و ئاوەدانی و وەبەرهێنانەوە لە ئاستی پێویستدا نیە و دەبێت گرنگی زیاتری پێبدرێت.

پارێزگای هەڵەبجە بریتیە لە شاری هەڵەبجە و ناحیەکانی خورماڵ و بیارە و سیروان و بەمۆ، بە هەموو گوندەکانیانەوە و ژمارەی دانیشتوانەکەی نزیکەی ١٢٠ هەزار کەسە.

١- لە ڕوی گەشتوگوزارەوە:

دەریاچەی سیروان کە ١٥ کیلۆمەتر لە هەڵەبجەوە دوورە، یەکێکە لە شوێنە دڵڕفێنەکانی کوردستان، حکومەت دەتوانێت بەنداوێکی لەسەر دروستبکات چونکە تەنها لە بەهار و زستاندا ئاوی تێدایە و لە پایز و هاویندا وشک دەکات.

ئەم بەنداوە دەتوانێت ئاوەکەی گلبداتەوە و بیکات بە ناوچەیەکی گەشتیاری چواروەرزە. پاشان حکومەت دەتوانێت ڕێگە و ئاو و کارەبای بۆ ڕابکێشێت. هەروەها دەتوانێت هانی وەبەرهێنی ناوخۆیی و بیانی بدات پرۆژەی گەشتیاری لە کەناری ئاوی سیروان دروستبکەن، کە نەک هەر دەبێت بە شوێنێک بۆ کاتبەسەربردن بۆ خەلکی پارێزگای هەڵەبجە، بەڵکو هەزارەها گەشتیار لە سەرجەم پارێزگاکانی کوردستان و عێراقەوە دەتوانن ڕویتێبکەن و سەرەنجام ئابوری هەڵەبجە و دەڤەری شارەزور ببوژێتەوە. هەروەها سود بە کەرتی کشتوکاڵیش دەگەیەنێت.

سەر بەنداوەکەش دەکرێت وەک پرد سودی لێببینرێت، کە دوری نێوان سلێمانی و هەڵەبجە بە ١٥ کیلۆمەتر کەمدەکاتەوە. لە حاڵەتی دروستکردنی ئەو بەنداوەدا، دوو ئاو دەریاچەی سیروان پڕدەکەن کە بریتین لە ئاوی تانجەرۆ و ئاوی زەڵم. هۆنراوەکەی پیرەمێردیش باسی ئەو دوو ئاوەکە دەکات وەختێک دەڵێت:

دوو ئاوانەکەی شوێن ماڵە گەورە
سەرەوخوار ئەڕۆی بە پێچ و دەورە
تۆ بە ڕوناکی وێنەی بلوری
ئاوی زیندەگی گشت شارەزووری

ئاوی دەربەندیخانیش ٧٥% ی لە ڕوباری سیروانەوە دێت کە سەرچاوەکەی لە ئێرانە و حکومەتی ئێرانیش دوو بەنداوی لەسەر دروستکردوە و لەلای پاوەوە ڕێڕەوەکەی گۆڕیوە و ئاوەکەی دەبات بۆ نزیک سەرپێڵی زەهاو. ئەمەش ئاوی دەربەندیخان بەرەو کزی دەبات. کەواتە دروستکردنی بەنداوی سیروان بۆتە زەرورەت، چونکە سەرچاوەکانی (دوو ئاوانەکە) لە ناو خاکی هەرێمی کوردستاندان و هیچ وڵاتێک ناتوانێت دەستکاریان بکات. لەو حاڵەتەدا دەریاچەی سیروان لە بری دەربەندیخان دەتوانێت ئاوی خواردنەوەی پارێزگای سلێمانی و هەڵەبجە و گەرمیانیش دابینبکات.

هاوکات دروستکردنی ڕێگەیەکی ١٧کم لە هەڵەبجەوە بۆ سازان و بەنێودەوڵەتیکردنی مەرزی سازان یەکێکە لە ڕێگەچارەکان بۆ پەرەدان بە بواری بازرگانی و جوڵەی بازاڕ لە هەڵەبجەدا.

بەهۆی کیمیابارانەوە هەڵەبجە بۆتە ناوێکی نێودەوڵەتی. دەکرێت هاوشێوەی هێرۆشیما و ناکازاکی یابان، ساڵانە چەندین ڤیستیڤاڵ و کۆڕ و کۆنفرانس لە هەڵەبجە سازبکرێن لەبارەی مەترسیەکانی چەکی کیمیایی و کۆمەڵکوژەوە و لە وڵاتانی دنیاوە خەلک بانگبکرێن، کە هەم هەڵەبجە و نەهامەتیەکانی کورد زیاتر بە دنیا دەناسێنێت، هەم بەهۆی هاتنی چەندین وەفد و خەڵکەوە ئابوری هەڵەبجەش دەبوژێتەوە.

سەبارەت بە خورماڵیش، ئەوەی پێیدەڵێن گەڕاوەکەی خوڕماڵ و ئاوی گەرمی کانزایی هەیە و بۆ پێست باشە، دەکرێت چەندین پرۆژەی گەشتیاری و پزیشکی لێبکرێتەوە بۆ چارەسەری نەخۆشیەکانی پێست ڕۆماتیزمە و ببێت بە شوێنێکی گەشتیاری پزیشکی.

لەم روەشەوە چەندین نمونە لە دنیادا هەن، یەکێک لەوانە شارێکە بە ناوی کارلۆڤی ڤاری (Karlovy Vary) لە وڵاتی چیک. بەهۆی بونی ئاوی کانزاییەوە ساڵانە هەزارەها گەشتیار ڕویتێدەکەن. بەڵام لەبەر ئەوەی شارەکەیان ڕازاندۆتەوە گەشتیار چەند ڕۆژێک دەمێنێتەوە و پارەی زیاتر خەرج دەکات، بەو هۆیەشەوە ئابوری شارەکە بوژاوەتەوە. بە هەمان شێوە ناوچەیەکیش هەیە لە تورکیادا بە ناوی پەموکالێ (Pamukkale). دەکرێت لە خورماڵ چەندین چارەسەرگا و سپا و هۆتێل و ڕیستۆرانت دروستبکرێن و بکرێن بە ناوچەیەکی گەشتیاری پزیشکی.

تەوێڵە و بیارە و ئەحمەدئاوا و شنروێ و ئاوێسەر و زەڵم و هاوار و عەبابەیلێ و وەزگێڵ و باوەکۆچەک لە جوانترین شوێنەکانی کوردستانن، دەکرێت حکومەت لە ڕوی ڕێگاوبان و ئاو و کارەباوە خزمەتی زیاتری ئەم ناوچانە بکات و دواتر هانی وەبەرهێنان بدات بۆ بنیاتنانی پرۆژەی گەشتیاری.

٢-لە ڕوی کشتوکاڵ و پیشەسازیەوە:

هەڵەبجە لە روی کشتوکاڵەوە خاوەنی زەویەکی بەپیتە لەسەر ئاستی جیهان. حکومەت دەتوانێت هانی دروستکردنی چەندین کارگە بدات کە بەروبومە کشتوکاڵیەکان بگۆڕن بۆ شەربەت و مرەبا و دۆشاو و ڕوبەهەنار و زەیتی زەیتون و سابون و چەندین بەرهەمی تر. واتە چەند کارگەیەک دروستبکرێن کە پشت بە کشتوکاڵ دەبەستن (Agro-Industrial Plants). هەروەها گرنگە سایلۆیەک لە نزیک هەڵەبجە دروستبکرێت بۆ عەمبارکردنی گەنم و دانەوێڵە. هەروەها ساردخانە دروستبکرێت بۆ هەڵگرتنی میوەهات.

عەنەب بە توتن بەناوبانگە و دەکرێت حکومەت هانی جوتیارەکانی ناوچەکە بدات دەستبکەن بە بوژاندنەوەی کێڵگەکانی توتن و هانی وەبەرهێنەکان بدات کارگەیەکی گەورەی توتن و جگەرە لە نزیک عەنەب دروستبکەن. ڕاستە جگەرە کاڵایەکی زیانبەخشە، بەڵام مادەم هەر کڕیاری هەیە، واباشترە لە جوتیار و وەبەرهێنی کورد بکڕدرێت و سود و داهاتەکەی بۆ ناوخۆ بێت.

٣-لە ڕوی کەرتی نەوتەوە:
ناوچەی هەڵەبجە بلۆکی ژمارە ٥٦ ە و درابوو بە کۆمپانیای گازپرۆمی ڕوسی. بەپێی مەزەندە یەدەگی نەوتی ئەم بلۆکە ٧٠٠ ملیۆن بەرمیلە. بەڵام بە هۆکارێکی نادیار لە سەردەمی ئاشتی هەورامیدا گازپرۆم ناوچەکەی بەجێهێشت.

ئەگەر لامەرکەزیەت پەیڕەوبکرێت و دەسەڵات و پارە بدرێتەوە بە پارێزگاکان، ئەوا هەڵەبجە بە پارەی نەوتەکەی خۆی دەتوانێت ئەو پرۆژانە جێبەجێبکات کە لە سەرەوە باسمان کرد و ببێت بە پارێزگایەکی دەوڵەمەند و نمونەیی لە کوردستان و عێراقیشدا. بەڵام ئەگەر وەک ئێستا دەسەڵات و داهات هەمووی لە پایتەخت و لە دەستی سەرۆکی حکومەتدا بێت، دۆخی پارێزگای هەڵەبجەش وەک خۆی دەمێنێتەوە و هیچ پرۆژەیەکی ستراتیژی ڕویتێناکات.

تێبینی: زۆر سودم لە زانیاریەکانی ئەندازیار کاک عومەر عینایەت وەرگرت، کە هەم زانیاریەکی زۆری لەسەر جوگرافیا و سروشتی ناوچەکە هەبوو  هەم زۆر خەمخۆر و دڵسۆزی هەڵەبجە بەتایبەتی و کوردستان بە گشتی بوو  هەروەها زۆر سودم لە زانیاریەکانی برایانی بەڕێزم کاک هادی حەمە ڕەشید و مامۆستا سادق شێخ عوسمان سازانی وەرگرت.

 

بەردەوام بە لە خوێندنەوە

کوردستان