ئێمە لە تۆرە کۆمەڵایەتیەکان

ئابوری

ماوەی 3 ساڵە پلەبەرزكردنەوەی هێزەكانی پێشمەرگە ڕاگیراوە

خەڵك – بەشی هەواڵ
جێگری سەرۆكی ئەركان بۆ مەشق و ئۆپراسیۆنەكان لە وەزارەتی پێشمەرگە ڕایدەگەیەنێت، لەماوەی ڕابردوودا خشتەی پلەبەرزكردنەوەی ساڵی 2017 ڕەوانەی ئەنجوومەنی وەزیران كراوە، چاوەڕێی گەڕانەوەی خشتەكەین، دەشڵێت: “تا مانگی ئازاری ئەمساڵ 7 خشتەی پلەبەرزكردنەوەی ئەفسەرانی وەزارەتی پێشمەرگە دواكەوتووە”.

بەپێی خشتەی پلەبەرزركردنەوەی ئەفسەرانی وەزارەتی پێشمەرگە ساڵانە دوو جار لە مانگی (ئازار و ئەیلول) پلەی ئەفسەران بەرزدەكرێتەوە واتە بۆ هەر ساڵێك دوو خشتە، بەڵام تا ئێستا پلەبەرزكردنەوە بۆ ساڵەكانی (2017 -2018-2019) نەگەڕاوەتەوە بۆ هێزەكانی پێشمەرگە و لەمساڵیشدا خشتەی مانگی ئازار زیاد دەكات.

لیوا قارەمان كەمال، جێگری سەرۆكی ئەركان بۆ مەشق و ئۆپراسیۆنەكان لەوەزارەتی پێشمەرگە بە (خەڵك)ی ڕاگەیاند، لەماوەی ڕابردوودا لیژنەیەكی باڵا لە ئەنجوومەنی وەزیران سەردانی وەزارەتی پێشمەرگەی كرد، قسەوباس لەسەر خشتەی پلەبەرزركدنەوەی ئەفسەرانی وەزارەتی پێشمەرگە كرا.

وتیشی، “لەگەڵ ئەوەی لیژنەی باڵا ئەنجوومەنی وەزیران هەندێك تێبینیان هەبووە لەسەر خشتەكان، بەڵام وەزارەتی پێشمەرگە پێداگربووە لەسەر ئەوەی پێویستە لەكاتی خۆیدا ئەفسەرانی وەزارەتی پێشمەرگە پلەكانیان بۆ بەرز بكرێتەوە”.

ڕاشیگەیاند، لە ئێستادا خشتەی پلەبەرزكردنەوەی ساڵی 2017 بە خشتەی ئازار و ئەیلول لە ئەنجوومەنی وەزیرانە بۆ واژۆكردن، ئێمە چاوەڕێی ئەوەین، بەرزبكرێتەوە بۆ سەرۆكایەتی هەرێم.

ئاشكراشیكرد، كە ئەو هیچ ئاگاداری ئەوەنیە، خشتەكان واژۆ كرابێت و ڕەوانەی سەرۆكایەتی هەرێم كرابێت، بەڵام پێداگری كرد لەوەی خشتەكەیان ڕەوانەی ئەنجوومەنی وەزیران كردووە بۆ ئەوەی واژۆ بكرێت.

ئەمە لەكاتێكدایە، كە لە سەرەتای ساڵی 2016شەوە، كە ماوەی 4 ساڵە پلەبەرزكردنەوەی فەرمانبەرانی مەدەنی ڕاگیراوە، بەڵام پلەبەرزكردنەوەی ئەفسەران و كارمەندانی ناوخۆ لەكاتی خۆیدا ئەنجام دەدرێت.

لە چەند ڕۆژی ڕابردووشدا شۆڕش ئیسماعیل، وەزیری پێشمەرگەی هەرێم ڕایگەیاند، كە سەرۆك وەزیرانی هەرێمی لە كێشەی پلەبەرزكردنەوەی هێزەكانی پێشمەرگە ئاگادار كردۆتەوە و ئەویش بەڵێنی داوە چارەسەری بكات و لە چەند ڕۆژی داهاتوودا پلەبەرزكردنەوەی ساڵی 2017 بۆ هێزەكانی پێشمەرگە دەگەڕێتەوە.

ئابوری

لەدژی مووچەی فەرمانبەرانی هەرێم سكاڵا لەسەر وەزیری دارایی تۆماركرا

خەڵك- بەشی هەواڵ

پەڕلەمانتارێكی عیراقی و ئەندامی لیژنەی دارایی لەدژی ناردنی مووچەی فەرمانبەرانی هەرێم و ڕادەستنەكردنی نەوت بە بەغدا، سكاڵا لەسەر وەزیری دارایی و كۆمپانیای سۆمۆ تۆمار دەكات.

سامر زیبان، ئەندامی پەڕلەمانی عیراق لە فراكسیۆنی سادیقون لە دادگای فیدڕاڵی عیراق سكاڵای لەسەر فوئاد حسێن، وەزیری دارایی تۆمار كردووە و تۆمەتباری كردووە بە “پێشێلكاری یاسای بودجە و دەستووری عیراقی”.

وەك لە سكاڵاكەیدا هاتووە، “هەرێمی كوردستان پابەند نەبووە بە ناردنی 250 هەزار بەرمیل نەوتی ڕۆژانە وەك لە یاسای بودجەی پەسەندكراوی ساڵی ڕابردوودا دیاری كراوە و هەر بەپێی یاساكە دەبوو لەبەرامبەردا لە پشكی هەرێم ببڕدرێت، بەڵام وەزارەتی دارایی پابەند نەبووە و ئەوەش پێشێلكردنی یاساكەیە و كارێكی مەترسیدارە بۆ سەر نەوەكانی داهاتوو”.

ئەو پەڕلەمانتارە داوای لە دادگای فیدڕاڵی كردووە، وەزیری دارایی بانگهێشت بكات و پابەندی بكات بە هەڵوەشاندنەوەی بڕیارەكانی و لەنێویشیاندا ناردنی مووچەی فەرمانبەران تا ئەو كاتەی هەرێم پابەند دەبێت.

بەردەوام بە لە خوێندنەوە

ئابوری

دابەشكردنی مووچەی وەزارەتێكی دیكە ڕاگەیەنرا

خەڵك- بەشی هەواڵ
وەزارەتی دارایی و ئابووری حكومەتی هەرێم دابەشكردنی مووچەی مانگی 11ی ساڵی ڕابردووی وەزارەتی داد ڕادەگەیەنێت.

سەرچاوەیەك لە وەزارەتی دارایی و ئابووری هەرێم بۆ (خەڵك) ئاماژەی بەوەكرد، كە سبەینێ‌ پێنج شەممە 20ی شوبات مووچەی وەزارەتی داد دابەش دەكرێت.

ڕاشیگەیاند، كە چاوەڕێی گەیشتنی پارەی مووچەن لە بەغداوە، لەگەڵ گەیشتنی پارەكە خشتەی مووچەی سەرجەم وەزارەتەكان ڕادەگەیەنن.

نیوەی مانگی 2ی 2020 تێپەڕیوە و تا ئێستا مووچەی مانگی 11ی ساڵی ڕابردووی فەرمانبەران بە تەواوی دابەش نەكراوە.

بەردەوام بە لە خوێندنەوە

ئابوری

پسپۆڕێكی ئابووری: پێویستە حكومەت متمانە بۆ هاووڵاتیان و فەرمانبەران بگەڕێنێتەوە

خەڵك-ئارام سەردار
مامۆستایەكی زانكۆ ڕایدەگەیەنێت، بۆ كەمكردنەوە ڕێژەی هەژاری پێوستە حكومەت هاوكاری پڕۆژەی بچووك و پەرەپێدانی وەبەرهێنان بێت لەسەرجەم كەرتە جیاوازەكان.

ئیدریس ڕەمەزان، مامۆستای زانكۆ و پسپۆڕی ئابووری سەبارەت بە ڕێژەی هەژاری و چۆنیەتی كاركردنی حكومەت بە(خەڵك)ی ڕاگەیاند، پێویستە حكومەت متمانە بۆ هاووڵاتیان بگەڕێنێتەوە، بەتایبەت فەرمانبەرانی كەرتی گشتی، كەوا مووچەكانیان لەكاتی خۆی پێبدرێت و ئێستاش، كە مووچەكانیان لەكاتی خۆی پێدەدرێت و هیچ جۆرە كێشەیەك لەپڕۆسەی دابەشكردنی مووچە نیە.

دەشڵێت،: “دەبێت حكومەت هەوڵی دۆزینەوەی دەرفەت و هەلی كار بدات بۆ گەنجان و تاكەكانی كۆمەڵگە لەكەرتی گشتی یان كەرتی تایبەت بێت، لەهەمان كاتدا حكومەت هاوكاری تاكەكانی كۆمەڵگە بێت بۆ پەرەپێدانی پڕۆژەی بچووك و كاری بچووك بە پێشكەشكردنی هاوكاری دارایی و مەعنەوی”.

ئەو مامۆستایەی زانكۆ ئاماژە بۆ ئەوەش دەكات، بۆ كەمكردنەوەی ڕێژەی بێكاری و هەژاری پێویستە كەرتی وەبەرهێنان ببووژێندرێتەوە و كار بۆ بەردەوامی و فراوانكردنی وەبەرهێنان بدرێت لەسەرجەم كەرتە جیاوازەكان.

بەپێی ئامارێكی دەستەی ئاماری هەرێمی كوردستان ڕێژەی هەژاری لە سەر ئاستی هەرێمی كوردستان و پارێزگاكان و عیراق خستەڕوو و لە خشتەیەكدا ڕێژەی هەژاری بۆ ساڵانی ٢٠١٤ و ٢٠١٨ دیاری كرا، كە بەپێی خشتەی دەستەی ئامار لە ساڵی ۲۰۱۸ ڕێژەی هەژاری لەهەرێم لە ٥.٥٪ بووە، لەعیراق لە ۲۰٪، لەسەر ئاستی پارێزگاكانیش لە دهۆك زۆرترین ڕێژە هەبووە، كە لە ۸.٦٪ بووە، لە هەولێر لە ٦.۷٪ بووە و سلێمانیش كەمترین ڕێژەی بێكاری تێدا تۆماركراوە لە ٤.٥٪ بووە، بەپێچەوانەوە ڕێژەی بێكاری لە ساڵی ۲۰۱٤دا لە دهۆك لە ۱۲.٤٪ بووە لەهەولێر لە ۱.٥٪ بووە، سلێمانیش ۱.۲٪ بووە، لەسەر ئاستی هەرێم ڕێژەی بێكاری لە ۱۲.٥٪ بووە، لەعیراقیش لەهەمان ساڵ ۲۲.٥٪ بووە.

بەردەوام بە لە خوێندنەوە

کوردستان